„Dettur einhverjum í hug að sjávarútvegsráðherrann láti taka þessa skýrslu saman og birta hana fyrir kosningar?“
Þessari spurningu varpar Guðmundur Gunnarsson, fyrrverandi formaður Rafiðnaðarsambands Íslands fram á Facebook-síðu sinni.
Þar deilir hann umfjöllun Kjarnans þar sem fjallað var um tafir á útgáfu skýrslu um eignarhald 20 stærstu útgerðarfélaga landsins í íslensku atvinnulífi. Alþingi samþykkti í desember að Kristján Þór Júlíusson sjávarútvegsráðherra léti útbúa skýrsluna og eru ellefu vikur liðnar frá því að beiðnin var samþykkt. Samkvæmt þingskapalögum hefur ráðherra 10 vikur til að vinna skýrsluna.
Hanna Katrín Friðriksson, þingmaður Viðreisnar, var fyrsti flutningsmaður tillögunnar. Hún sagði frá því í vikunni að hún hefði fengið skilaboð þess efnis frá ráðuneytinu að ekki væri hægt að taka skýrsluna saman nema að hún yrði miðuð við árin 2016 til 2019, en ekki tíu ár aftur í tímann eins og upphaflega var lagt upp með.
Guðmundur hefur litla trú á því að skýrslan muni líta dagsins ljós fyrir kosningar sem fram fara í september næstkomandi.
„Eigendur sjávarútvegsfyrirtækja hafa fengið rúmlega 100 milljarða í arð á innan við áratug. Samherji, stærsta sjávarútvegsfyrirtæki landsins með beint og óbeint yfir 17 prósent alls úthlutaðs kvóta, hefur til að mynda verið ráðandi í Eimskip og á stóran hlut í Jarðborunum. Þá er SVN eignafélag, sem er í eigu Síldarvinnslunnar (Samherji á beint og óbeint 49,9 prósent hlut i henni), langstærsti eigandi Sjóvá með 14,52 prósent eignarhlut.
Kaupfélag Skagfirðinga, Hvalur hf., Stálskip og Ísfélag Vestmannaeyja eru dæmi um önnur félög í útgerð, eða sem voru í útgerð en hafa selt sig út úr henni, sem eru afar umsvifamikil í íslensku viðskiptalífi.“
