Systkinin Hanna Björg Vilhjálmsdóttir og Páll Vilhjálmsson eru alls ekki sammála um hvað kynin eru mörg, þau ræddu það í viðtali hjá Morgunblaðinu. Hanna Björg hefur vakið mikla athygli í haust eftir að hún skrifaði harðorða grein um KSÍ sem endaði með afsögn stjórnarinnar. Páll hefur hins vegar lengi vakið mikla athygli með bloggskrifum sínum sem rata reglulega í Staksteina Morgunblaðsins, síðasta hneyksli var þegar hann dróg í efa geðheilsu Helga Seljan.
Páll ræddi samband sitt við Hönnu við DVnýlega: „Mér þykir mjög vænt um systur mína Hönnu og við höfum lært það í gegnum tíðina að vera sammála um að vera ósammála um suma hluti í lífinu,“ segir Páll. Það var þó kannski ekki alltaf raunin og þurftu foreldrar þeirra stundum að stilla til friðar þegar systkinin tókust á.
Þau mættu síðan saman til Eggerts Skúlasonar í Dagmálum Morgunblaðsins. Þar fá landsmenn smá nasanef af því sem foreldrar þeirra þurftu að glíma við.
„Við lærum það að kynin eru tvö,“ sagði Páll í umræðu um fjölda kynja.
Systir hans var fljót að grípa frammí fyrir honum: „Nei, þau eru fleiri.“
Páll er greinilega vanur og brást hratt við: „Hvort eru þau þrjú, fimm eða sautján?“
Hanna Björg: „Það skiptir bara engu máli.“
Páll: „Nei, einmitt. Þau eru bara tvö. Sjáðu, hún er ekki sammála mér.“
Hanna var ekki sátt: „Ertu að segja að það séu bara til tvö kyn?“
Páll: „Já ég er að segja það.“
Hanna sagði þá: „Ó mæ god! Fólk sem segist ekki vera stelpa eða strákur. Ætlar þau bara að segja: „Jú þú ert annað hvort.“
Páll hélt ró sinni: „Það eru bara til tvö kyn.“
Hanna skammaði hann með fullu nafni: „Páll Vilhjálmsson!“
Páll spurði á móti: „Hvað eru þau þá mörg? Eru þau þrjú hundruð?“
Hanna skilur ekkert í bróður sínum: „Það veit ég ekkert um.“
Páll hélt þá áfram: „Leyf mér að útskýra þetta. Þetta sem Hanna er að vísa til hefur valdið stórkostlegum skaða austanhafs og vestan.“
