Hátíðarhöld á 17. júní verða með breyttu sniði í Reykjavík í ár vegna COVID-19 veirunnar. Eru borgarbúar hvattir til að halda upp á daginn með vinum og fjölskyldu og skreyta heimili og garða með fánum og öðru í fánalitunum.
Í tilkynningu sem Reykjavíkurborg sendi frá sér kemur fram að morgunathöfn á Austurvelli verði í beinni útsendingu í sjónvarpi RÚV þar sem landsmenn geta fylgst með heima í stofu. Athöfnin er hefðbundin og samanstendur af ávarpi Forsætisráðherra og fjallkonan frumflytur sérsamið ljóð við tilefnið.
Að venju sjá nýstúdentar um að leggja blómsveig við leiði Jóns og Ingibjargar í Hólavallakirkjugarði að lokinni morgunathöfn á Austurvelli. Forseti borgarstjórnar flytur ávarp og skátar standa heiðursvakt. Borgin verður skreytt með fánum og blómum.
Fyrir þá sem ætla að bregða sér niður í bæ þá verður létt stemning í miðborginni frá klukkan 13 til 18. DJ Dóra Júlía sér um tónlist á Klambratúni og gestir geta gætt sér á veitingum úr matarvögnum á vegum Götubitans og sirkuslistafólk Hringleiks sýna listir sínar. Hægt verður að heyra lúðrasveitarþyt í miðborginni á milli kl. 13-18, sirkuslistafólk Sirkuss Íslands, kórar, Listhópar Hins hússins og Götuleikhúsið bregða á leik víðsvegar um miðborgina til að skapa óvæntar upplifanir.
„En eins og sagði í upphafi er fólk hvatt til að setja upp sína eigin þjóðhátíð með vinum og ættingjum. Grilla, syngja, dansa og uppgötva sirkuslistamanninn í sjálfum sér á heimavelli. Útlit er fyrir tíu stiga hita, lítils háttar skúrum og mildu veðri,“ segir í tilkynningunni.
Þá munu Saga Garðarsdóttur og Katrín Halldóra ráðleggja borgarbúum í skemmtilegum myndskotum um það hvernig hægt er að halda upp á daginn með pompi og prakt í sínum garði, götu eða næsta græna svæði í nágrenninu. Hægt verður að nálgast myndskotin á Facebook síðu 17. júní og Reykjavíkurborgar.
Þá er bent á sýninguna Næsta stopp um Borgarlínuna og uppbyggingu hennar í Ráðhúsinu. Eru áhugasamir hvattir til að koma í Ráðhúsið og kynna sér framtíðaráform um samgöngur á höfuðborgarsvæðinu.
