Allar líkur eru á því að það verði rigning um allt land næstu helgi, ef marka má veðurspá Veðurstofunnar.
„Það er ekki sérlega gott veður á föstudag og laugardag á landinu, en á sunnudag ætti veðrið að skána,“ segir Marcel De Vries, veðurfræðingur hjá Veðurstofu Íslands í samtali við Fréttablaðið.
Hann segir að það sé lægð sem er að fara yfir suðausturhluta landsins og að það eigi að byrja að rigna á föstudag.
Í Vestmannaeyjum styttir upp á laugardag, en helgin verður öll blaut á Akureyri ef marka má veðurspána.
„Þessi lægð kemur á landið á aðfaranótt laugardags og þegar hún færist til norðausturs þá snýst vindurinn í norðlæga átt og þá styttir smám saman upp fyrir sunnan og vestan seint á laugardag. Á sunnudag er útlit nokkuð gott, skýjað með köflum fyrir vestan og bjart fyrir austan. Almennt úrkomulítið,“ segir Marcel.
Hann segir að hitinn verði almennt í kringum tíu stig um helgina, en það verður hlýjast yfir landinu á sunnudaginn.
„Á mánudag verður hæg suðaustlæg átt, þurrt að mestu. Það verður skýjað vestan til á landinu, en bjartar á austanverðu landinu,“ segir Marcel.
Hann segir að þeir sem ætli á Þjóðhátíð í Vestmannaeyjum megi búast við rigningu.
„Þetta verður smá erfitt á föstudag og á laugardag í Vestmannaeyjum. Það styttir upp um hádegisbil á laugardag, en svo er veður nokkuð gott um allt land á sunnudag og mánudag,“ segir Marcel.
Þá segir hann að það eigi að rigna yfir helgina á Akureyri, en það styttir upp á aðfaranótt sunnudags. Á Egilsstöðum á að draga úr úrkomu á seinnipart laugardags.
„Það verður svo bjart yfir landinu á sunnudag og mánudag. Á þriðjudag verður rólegt veður, skýjað að mestu en bjart fyrir austan. Svo er útlit fyrir að það fari að rigna aftur á miðvikudaginn,“ segir Marcel.
