Sverrir varpar ljósi á það sem gæti gerst þegar egypska fjöl­skyldan lendir í Kaíró

Sverrir Agnars­son, fyrr­verandi for­maður Fé­lags múslima hér á landi, segir að ýmsar bá­biljur hafi verið gegnum­gangandi á sam­fé­lags­miðlum um mál egypsku flótta­fjöl­skyldunnar sem nú er í felum hér á landi.

Sverrir rekur þær helstu í at­hyglis­verðri grein á vef Vísis, en ein þeirra er sú að egypskir með­limir Múslímska bræðra­lagsins taki að streyma til landsins ef fjöl­skyldunni verður leyft að dvelja hér á­fram.

„Það er engin hætta á að Egyptar streymi hingað – nokkur sam­töl við vini og kunningja í Kairo leiða í ljós að það þarf alla vega tvær skráningar og 4-5 stimpla til að sleppa út og menn eru undir eftir­liti allan tímann á flug­vellinum og komast ekki í gegnum eftir­litið nema sýna sk öryggis­vottun og hreina saka­skrá og með­limur í MB á ekki sjens í að fá þessi vott­orð. Egypta­land er með landa­mæri að Is­rael, Líbýju, Súdan og stutt yfir Aqaba sundið til Saudi Arabíu. Með­limir í MB Geta ekki flúði til þessara landa,“ segir Sverrir.

Þá hefur verið bent á að Múslímska bræðra­lagið séu hryðju­verka­sam­tök. Bendir hann á að ein­göngu Egypta­land, Sádi-Arabía, Fursta­dæmin, Rúss­land og stjórn Assads Sýr­lands­for­seta skil­greini Múslímska bræðra­lagið í Egypta­landi sem hryðju­verka­sam­tök.

Sverrir hrekur fleiri at­riði í pistlinum sem má lesa í heild sinni hér.

Í pistlinum varpar Sverrir svo ljósi á það sem gæti gerst fari svo að fjöl­skyldan verði send aftur til Egypta­lands.

„Þegar egypska fjöl­skyldan sem nú er í felum á Ís­landi hittir lög­regluna í Kai­ró, en það verða ís­lenskir lög­reglu­menn sem af­henda kollegum sínum hana, þá eru ís­lensk stjórn­völd í beinni sam­vinnu við yfir­vald sem stundar reglu­legar og um­fangs­miklar pyntingar. Í skýrslu frá Am­ne­sty frá því í fyrra stendur í raun skrifað að faðirinn (og mögu­lega móðirin) verði pyntaður og hversu langt verður gengið veltur á tímanum sem það tekur að brjóta hann niður. Þetta er af­gerandi niður­stöður Amen­sty – og mis­tök að senda fólk í þetta um­hverfi. Yfir­völd hér vé­fengja ekki hans frá­sögn. Hvernig er þá hægt að senda fjöl­skylduna til baka? Eru engin lög eða reglur sem gilda um fram­sal fólks til landa sem stunda pyntingar?“