Sveinn Rúnar Sigurðsson lagahöfundur í Söngvakeppninni segir Rússum til syndanna í nýrri Facebook færslu. Hann fékk símtal frá froðufellandi starfsmanni rússneska sendiráðsins vegna framkomu sinnar í Söngvakeppninni á dögunum.
Sveinn kom þar fram og sagði sendiherranum að fara til fjandans á rússnesku í beinni útsendingu. Hann hæðist að öllu saman í Facebook færslu og segist aldrei hafa komið fram í sjónvarpi.
Færsla Sveins í heild sinni:
„Froðufellandi starfsmaður rússneska sendiráðsins hafði samband og kvartaði undan því að ég hafi sagt sendiherra sínum að fara til fjandans í sjónvarpi... Það hef ég aldrei gert. Ég hef aldrei komið fram í sjónvarpi. Myndir af mér í klæðnaðinum á myndinni eru falsaðar og hugmyndir sendiráðsins um það hvað stendur á bakvið fána Úkraínu eru byggðar á tómum getgátum. Sú staðreynd að mestu kóræfingar í Íslandssögunni muni bráðum fara fram norðan, sunnan og austan við rússneska sendiráðið er tilviljun ein.
Sú staðreynd að eingöngu verður sungið á Úkraínsku er tilviljun. Það að íslenskir & brakandi ferskir langdrægir tómatar séu í vösum fjöldans utan sendiráðsins er tilviljun. Við elskum einfaldlega öll sem eitt Íslenskt grænmeti. Muni sendiráðið hinsvegar henda einni skammdrægri rússneskri rauðbeðu yfir gangstéttarbrúnina í átt að fjöldanum verður því umsvifalaust svarað af viðlíka krafti að heimsbyggðin hefur aldrei orðið vitni að öðru eins.
Boombox verða ræst, í suðri, noðri og austri.. Carol of the bells (Schedryk) mun hljóma og minna smámennið í sendiráðinu á að morð Kremlar á höfundi þess, Mykola Leontovych átti sér stað fyrir ákkúrat 100 árum, en hann var myrtur fyrir sömu sakir og börn og almennir borgarar Úkraínu eru myrt nú... vegna aldagamallar baráttu þjóðar fyrir frelsi og lýðræði. Meðfylgjandi hr. sendiherra er emoji af friðarmerki með fingrum. Hugmyndir þínar um að þetta sé eitthvað annað, eru helberar lygar og áróður...“
