Sveinn Þ. Guðbjartsson, fyrrverandi forstjóri Sólvangs, er látinn, 82 ára að aldri. Greint er frá andláti Sveins í Morgunblaðinu í dag. Sveinn var Hafnfirðingur í húð og hár og var áberandi á mörgum sviðum í bænum um langt skeið.
Sveinn fæddist í Hafnarfirði þann 28. janúar árið 1938 og stundaði nám í stjórnun heilbrigðisstofnana í Gautaborg. Hann var í 35 ár stjórnandi á heilbrigðissviði, heilbrigðisfulltrúi Hafnarfjarðar, framkvæmdastjóri Heilsugæslu Hafnarfjarðar og forstjóri Sólvangs.
Þá var hann varaformaður SUS, átti sæti í stjórn fulltrúaráðs sjálfstæðisfélaganna í Hafnarfirði og var stofnfélagi Golfklúbbsins Keilis í Hafnarfirði. Þá var hann formaður Íþróttabandalags Hafnarfjarðar og landsforseti JC á Íslandi. Þá var hann einn af stofnendum Kiwanis á Íslandi og tók þátt í stofnum fleiri Kiwanisklúbba svo fátt eitt sé nefnt.
Sveinn kvæntist Svanhildi Ingvarsdóttur árið 1959 en hún lést í mars síðastliðnum. Þau eignuðust eina dóttur, tvö barnabörn og þrjú barnabarnabörn.
