Sveinn Andri segir hryðju­verk­málið farsa: „Minn um­bjóðandi er al­gert mein­leysis­grey með ofsa­legan á­huga á byssum“

Hæstaréttarlögmaðurinn Sveinn Andri Sveins­son, ný­skipaður verjandi annar mannanna sem er í gæslu­varð­haldi vegna meints hryðju­verk, segir í sam­tali við DV að hryðjuverkamálið svokallaða sé hvorki fugl né fiskur.

Lög­reglan vildi fá geð­lækni til meta skila­boð mannanna sín á milli og hvort þeir væru að grínast en þeirri beiðni var hafnað. „Enda galið, það er dómara að meta á­setning,“ segir Sveinn Andri í við­tali við DV.

Sveinn telur málið vera far­sa­kennt og segir af og frá að umbjóðandi sinn hafi í raun verið að undir­búa hryðju­verk.

„Þetta er kok­teill af ó­smekk­legu gríni og fabúla­sjónum. Ekkert á bak við þetta. Til að um til­raun í skilningi refsi­réttar geti verið að ræða verður að vera um undir­búnings­at­hafnir að ræða.“

Sveinn segir skjól­stæðing sinn vera mein­lausan og ó­færan um að fremja slík myrkra­verk sem lög­regla segir hafa verið í upp­siglingu: „Ég hef auð­vitað ekki um­boð til að tala fyrir hinn. En minn um­bjóðandi er al­gert mein­leysis­grey með ofsa­legan á­huga á byssum. Hann hefur vissu­lega gerst sekur um brot á vopna­lögum með því að prenta byssur. Þetta varð hobbý hjá honum í co­vid.“

Sveinn bendir á að frá­leitt sé að menn leggi á ráðin um hryðju­verk á opinni spjall­rás líkt og hér hafi verið í gangi:

„Það var nú ekki meiri leynd yfir þessu ráða­bruggi öllu saman en að þeir voru að fimbul­famba þetta á opinni spjall­rás. Töluðu saman á Signal. Minn um­bjóðandi gaf lög­reglu öll mögu­leg lykil­orð að síma og tölvu. Signal var þarna eins og mess­en­ger, hvorki dul­kóðað, læst né þannig að texti félli út.“

Sveinn er ekki í nokkrum vafa um hvernig þetta mál, sem hefur verið kallað hryðju­verka­málið, muni enda:

„Það var engin al­vara á bak við þetta smekk­lausa spjall þeirra. Allir sem þekkja minn um­bjóðanda vita að hann gæti ekki gert flugu mein. Minn maður verður dæmdur fyrir vopna­laga­brot. Punktur. Þetta mál er hvorki fugl né fiskur.“

Þá segir það hafi verið mis­tök hjá lög­reglu að halda blaða­manna­fund.

„Lög­reglan gerði sig seka um að halda ó­tíma­bæran blaða­manna­fund. Það var engin þörf á honum. Hefðu þeir sleppt honum en ein­beitt sér að því að upp­lýsa málið, hefðu menn fljót­lega séð að ekki væri rétt að rjúka til og halda fund.“

Sveinn segir ennfremur að umbjóðandi sinn viti ekkert um pólitík og engan veginn nógu mikið til að hatast við tiltekna stjórnmálamenn:

„Hann hefur ekki grænan grun um hver Gunnar Smári er eða Sólveig Anna. Píratar eru í hans huga sjóræningjar. Hann veit minna um pólitík en kisan þín.“

Hægt er að lesa við­talið í heild sinni hér.