„Mogginn ákvað að fara á lága planið,“ segir Sveinn Andri Sveinsson hæstaréttarlögmaður sem gerir frétt sem birtist á vef Morgunblaðsins í gær að umtalsefni á Facebook-síðu sinni.
Fréttin sem um ræðir sneri að örlagavaldinum í Landsréttarmálinu svokallaða en hann var dæmdur í vikunni fyrir akstur undir áhrifum ávanalyfja og brot á vopnalögum svo eitthvað sé nefnt. Var hann sviptur ökuréttindum ævilangt í níunda sinn.
Í frétt Morgunblaðsins í gær, sem Andrés Magnússon er merktur fyrir, er maðurinn nafngreindur auk þess sem ítarlega er farið í brotaferil hans sem einna helst varðar umferðarlagabrot og fíkniefnabrot. Fyrirsögn fréttarinnar er: Mannréttindamaðurinn missir prófið ævilangt í níunda sinn.
Sveinn Andri þykir fréttaflutningur Morgunblaðsins heldur ómerkilegur og segir:
„Venjulega eru dómar um missi ökuréttinda ekki frétt, hvað þá að viðkomandi séu nafngreindir. Ekki nóg með það, heldur er blaðamanninum svo mikið niðri fyrir að hann verður að sýna vanþóknun sína á manninum sem lagði Sjálfstæðisflokkinn í Landsréttarmálinu að hann ákveður að uppnefna manninn í fyrirsögn. Hvað eru þeir að reykja þarna upp í Hádegismóum?“
