Sveinn Andri Sveinsson hæstaréttarlögmaður segir að Brynjar Níelsson, þingmaður Sjálfstæðisflokksins, sé haldinn ákveðinni röskun og ákveðnu blæti. „Ég er búinn að greina þig,“ segir hann í athugasemd við færslu sem Brynjar skrifaði í gær á Facebook-síðu sína.
Þeir sem fylgst hafa með skrifum Brynjars hafa vafalítið tekið eftir því að hann er stundum nokkuð upptekinn af stjórnarandstöðunni. Í færslu sinni í gær gagnrýndi hann Samfylkinguna harðlega og sagðist velta fyrir sér hvort hún væri haldin sjálfseyðingarhvöt. Benti hann á mál Ágústs Ólafar máli sínu til stuðnings.
„Nýjasta birtingarmynd sjálfseyðingarinnar er aðförin að Ágústi Ólafi. Ég þekki Ágúst Ólaf ekki mikið en þar sem ég hef meira innsæi og betri tilfinningu fyrir fólki en aðrir, veit ég að hann er hinn vænsti drengur þótt ófullkominn sé eins og við hin.“
Sveinn Andri veltir fyrir sér hvers vegna Brynjar er svona upp- og raunar heltekinn af stjórnarandstöðunni á Alþingi.
„Af því má ráða að þingmenn þeirra flokka séu að gera eitthvað rétt. Væri hún jafn slöpp og þú vilt meina, gæti þú einbeitt þér að því, á þessum vettvangi, að kynna öll þau framfaramál sem þú ert að vinna að á hinu háa Alþingi, með bros á vör, og gætir látið eins og stjórnarandstaðan vær ekki til.“
Brynjar svarar því til að honum sé bara svo annt um jafnaðarmenn að það er kvalafullt að horfa á þessa þróun.
„Svo sérð þú öll framfaramál okkar í frumvörpum ráðherra okkar. Mörg mjög góð og önnur síðri eins og gengur og gerist. En ég skil ekkert í þessari taugabilun þinni upp á síðkastið. Þú hefur sérhæft þig í að verja vondan málstað og þá er ég ekki að tala um þetta ESB blæti þitt.“
Sveinn Andri svarar á móti og segist hafa greint Brynjar.
„Ég er búinn að greina þig: Þér hefur aldrei verið annt um jafnaðarmenn. Þú ert hins vegar með Samfylkingar-blæti og Pírata-röskun. Það er alveg eins og ríkisstjórnin sé ekkert að gera (kannski tilfellið) og að þú sem stjórnarþingmaður sitjir með hendur í skauti. Það eina sem virðist komast að hjá þér er stjórnarandstaðan og hvað þau eru að gera og ekki að gera.“
Brynjar svarar því til að pólitík felist mikið í að greina andstæðinginn og gagnrýna hann svo kjósendur átti sig betur á því hversu „lítið erindi þessir flokkar eiga.“ Segist Brynjar hafa tekið það að sér þar sem fjölmiðlar eru svo slappir.
„Kannski full mikið af því góða að eyða allri sinni stjórnmálaorku í það að gagnrýna þá sem eru í minnihluta/stjórnarandstöðu. Það fær kjósendur til að spyrja sig hvort og þá hvað annað þú sért að afreka,“ segir Sveinn Andri á móti.
