Svanhildur Hólm Valsdóttir, framkvæmdastjóri Viðskiptaráðs, skrifar um James Webb sjónaukann í nýjum pistlií Viðskiptablaðinu.
„Í síðustu viku fengum við fyrstu myndirnar úr James Webb-geimsjónaukanum sem vonir eru bundnar við að geti svarað ýmsum spurningum um undur og upphaf alheimsins. Verkefnið kostar um 10 milljarða Bandaríkjadala, eða hátt í helming landsframleiðslu okkar á einu ári. Við borgum þetta reyndar ekki, heldur bandarískir skattgreiðendur, sem virðast bara býsna ánægðir með það,“ skrifar Svanhildur.
Í könnun sem birt var vestra í kjölfar fyrstu myndanna frá sjónaukanum sögðust nefnilega 60% telja að peningunum væri vel varið. Við erum jú forvitin dýrategund, eða eins og sagt er, við hugsum og þess vegna erum við. Það er því mikilvægt að kryfja gangverk lífsins – og kannski ekki síður hversdagsleikans. Af því tilefni eru hér nokkrar spurningar, valdar af talsverðu handahófi:
Hvort kom fyrst, hlíðin eða vatnið í heiti Vatnshlíðarvatns? Af hverju þarf fólk að tala svona mikið í kallkerfið í flugvélum? Hvers vegna setja unglingar tómar mjólkurfernur í ísskápinn? Hefur einhvern tímann verið haldinn of stuttur fundur? Veit fólk að Ítalir drekka minna en við, þótt þeir borgi miklu minna fyrir flöskuna og geti keypt áfengi hvar sem er? Af hverju er ég alltaf í öryggisleitarröðinni með fólkinu sem virðist aldrei hafa heyrt um öryggisleit? Hvenær ætli krakkarnir frétti að það sé uppþvottavél á heimilinu? Eiga allir sænskir karlmenn pastellitaða peysu? Hverjum datt í hug að aspir í húsagörðum væru góð hugmynd? Af hverju er ekki búið að breyta lögum um réttindi og skyldur starfsmanna ríkisins? Hvað er málið með allar þessar hrossaflugur og af hverju elska þær svefnherbergið mitt? Hvernig komst sítt að aftan aftur í tísku? Af hverju eru samrunamál miklu meira vesen á Íslandi en annars staðar? Og síðast en ekki síst – væri hægt að fá eitthvað af þessari evrópsku hitabylgju?“ skrifar Svanhildur að lokum.
