Svandís Svavarsdóttir heilbrigðisráðherra ber fullt traust til Víðis Reynissonar, yfirlögregluþjóns hjá almannavarnardeild ríkislögreglustjóra.
Þetta kom fram í viðtali við Svandísi í hádegisfréttum Bylgjunnar í dag og frétt Vísis. „Að sjálfsögðu nýtur Víðir Reynisson míns trausts. Hans skilaboð til samfélagsins hafa verið mjög mikilvæg í marga, marga mánuði. Alveg frá því að faraldurinn byrjaði í mars,“ sagði Svandís meðal annars.
Víðir hefur verið gagnrýndur fyrir mikinn gestagang á heimili hans helgina áður en hann smitaðist af COVID-19. Sitt sýnist hverjum í þeim efnum en Víðir er nú í einangrun vegna veirunnar..
Svandís sagðist ekki vilja ræða einstaka atburði í lífi fólks. Víðir hafi þegar útskýrt málið og finnst henni að það eigi að duga.
„Ég er ekki í þessu embætti til að vega og meta einstaka einstaklinga heldur setja meginreglur til að freista þess að ná utan um faraldurinn.“
Svandís sagði eðlilegt að samfélagið ræddi þessi mál þegar hún var spurð að því hvort gagnrýnin á hann hafi verið ósanngjörn. Mikilvægt væri þó að nálgast faraldurinn og aðgerðir af væntumþykju, gagnvart samfélaginu, sjálfum okkur og ekki síður hvert öðru.
Katrín Jakobsdóttir forsætisráðherra sagði einnig að Víðir nyti hennar trausts. Hann hefði komið heiðarlega fram og öll séum við að reyna að fóta okkur í erfiðum aðstæðum.
