Sunna Karen Sigurþórsdóttir fréttamaður mætti í Morgunútvarp Rásar 2 í morgun þar sem hún ræddi verðlag á innanlandsflugi. Mannlíf skaut því upp í netfrétt en setti mynd af Karen Kjartansdóttur þess í stað en titlaði hana sem Karen Ingólfsdóttur.
Karen Kjartansdóttir gerir stólpagrín að málinu öllu saman á Facebook síðunni sinni. Þar má sjá óuppfærðan hlekk frá frétt Mannlífs, sem nú hefur lagfært myndina og sett Sunnu Karen inn í stað Karenar Kjartans.
„Ehe ég er ekki Karen Ingólfs og hún vinnur ekki á Athygli og var ekki í útvarpsspjalli, frekar en ég var í útvarpsspjalli, heldur Sunna Karen Sigurþórsdóttir. Þetta svokölluð alslemma,“ skrifar Karen á léttu nótunum á Facebook.
„Þvílíkt OKUR! Áfram Neytanda-Karen Ingólfs!“ skrifar Sunna Karen við færsluna eiturhress að vanda. Í Morgunútvarpinu ræddi Sunna hve dýrt flugið til Egilsstaða er.
„Það er ódýrara að kaupa flug til Marokkó,“ sagði Sunna. Hún ætlaði að kaupa tvo miða og gangverðið á hverjum miða 47.500 krónur. Miðarnir hefðu kostað hana 95 þúsund.
