Styrmir Gunnarsson, ritstjóri Morgunblaðsins til 36 ára, segir að Bandaríkin séu forystulaust ríki. Óeirðir hafa verið í borgum vítt og breitt um Bandaríkin vegna dauða George Floyd í síðustu viku og segir Styrmir slíkir atburðir hafi ekki orðið þar í 50 til 60 ár.
„Ekki batnar ástandið í Bandaríkjunum. Í gær talaði Trump til þjóðarinnar og hótaði að senda bandaríska hermenn á bandarískan almenning. Gekk síðan til kirkju, eftir að leiðin að henni hafði verið rudd með táragasi og veifaði Biblíunni. Sýndarmennskan er yfirgengileg,“ segir Styrmir í færslu á bloggsíðu sinni.
Styrmir segir að Trump virðist ekki hafa dottið í hug að skynsamlegra væri að grípa til aðgerða gegn þeim ríkjandi ósið bandarískra lögreglumanna að misnota aðstöðu sína gegn svörtu fólki.
„Bandaríkin eru þessa stundina forystulaust ríki. Það heyrist lítið sem ekkert frá demókrötum. Hvar eru þeir? Það er ekki bara alvarlegt mál fyrir Bandaríkjamenn sjálfa - heldur heimsbyggðina alla. Átökin á milli alræðisríkja og lýðræðisríkja einkenna í vaxandi mæli samskipti ríkja á alþjóðavettvangi. Það reynir á kjósendur vestan hafs í nóvember að breyta þessari stöðu,“ segir Styrmir.
Styrmir fjallaði einnig um stöðuna í Bandaríkjunum í færslu í gær og þar velti hann fyrir sér stöðunni innan Demókrataflokksins sem hafi ekki tekist að finna sannfærandi forsetaefni. Styrmir segir þó að efnahagslegar þrengingar vegna kórónuveirunnar gætu gert Donald Trump erfitt fyrir að ná endurkjöri.
„Hið leiðandi heimsveldi á augljóslega við innri vandamál að stríða, sem gerir því erfitt fyrir að standa undir hlutverki sínu,“ segir hann.
