„Einhverjir þingmenn þurfa að taka að sér það hlutverk að spyrja þessarar viðkvæmu og erfiðu spurningar,“ segir Styrmir Gunnarsson, fyrrverandi ritstjóri Morgunblaðsins til áratuga, á bloggsíðu sinni.
Styrmir veltir því fyrir sér hvers vegna okkur gengur verr að koma böndum á kórónuveiruna en öðrum Norðurlandaþjóðum.
„Þetta er vafalaust viðkvæm spurning en við hljótum sem samfélag að leita svara við henni. Hlutfallstölurnar sýna, að við erum ekki í hópi þeirra, sem bezt gengur heldur í hinum hópnum sem verst gengur,“ segir Styrmir.
Rúmlega þúsund manns eru nú í einangrun með COVID-19 hér á landi. 50 smit eða fleiri hafa greinst hér á landi níu daga í röð og er fjórtán daga nýgengi innanlandssmita nú 253,9 á hverja 100 þúsund íbúa.
Styrmir spyr hvort ein skýringin sé sú að við höfum ekki gripið til nægilega harðra ráðstafana.
„Það er erfitt að sjá að sú geti verið skýringin ef aðgerðir hér eru bornar saman við aðgerðir annars staðar. Er skýringin sú að almennir borgarar hér hafi ekki tekið pláguna nægilega alvarlega? Það gæti verið. En þetta þarf að ræða á Alþingi,“ segir hann og bætir við að einhverjir þingmenn þurfi að taka málið upp.
„Ætla mætti að eyþjóð ætti auðveldara með að koma böndum á veiruna en þjóðir sem byggja lönd, sem liggja að öðrum löndum en svo virðist ekki vera. Hver er skýringin?“
