„Svo mikið atvinnuleysi, sem virðist vera fyrirsjáanlegt á næstu vikum og mánuðum á eftir að verða erfitt og skapa óróa og ókyrrð í samfélaginu, þótt öllum sé ljóst að ekki er öðru um að kenna en kórónuveirunni.“
Þetta segir Styrmir Gunnarsson, fyrrverandi ritstjóri Morgunblaðsins, á bloggsíðu sinni.
Styrmir hefur eðli málsins samkvæmt skrifað nokkuð um kórónuveiruna og áhrif hennar hér á landi að undanförnu. Um helgina sagði hann efnahagslegar afleiðingar veirunnar ættu eftir að vara í nokkur misseri, jafnvel út næsta ár. Þá vísaði hann í sérfræðinga sem telja að heimsbyggðin sé að sigla inn í kreppu sem jafnast á við kreppuna miklu fyrir 90 árum.
Styrmir sagði í færslu sinni í gær að aðgerðir ríkisstjórnarinnar varðandi hlutastörf muni hugsanlega koma í veg fyrir að atvinnuleysið verði meira.
„En þrátt fyrir að skýringarnir liggi fyrir og að töluvert sé gert til að draga úr því, mun það koma illa við þá, sem fyrir því verða. Þetta snýst ekki bara um mikinn tekjumissi, heldur koma margvísleg önnur félagsleg álitaefni við sögu,“ segir hann.
Styrmir veltir því fyrir sér hvort verkalýðsfélögin og skólakerfið geti komið til skjalanna með því að setja upp námskeið af ýmsu tagi. „Sem geti auðveldað þeim, sem missa vinnuna hversdagslífið og um leið gert þá hina sömu hæfari til að snúa til sinna fyrri starf með batnandi tíð.“
