„Það gæti því vel farið svo að næstu kosningar verði sögulegar,“ segir Styrmir Gunnarsson, fyrrverandi ritstjóri Morgunblaðsins, í pistli á bloggsíðu sinni.
Styrmir þekkir íslensk stjórnmál betur en margir og í pistlinum veltir hann fyrir sér næstu þingkosningum sem haldnar verða á næsta ári. Óvíst er þó hvenær kosningar fara fram, í fyrsta lagi vorið 2021 en í síðasta lagi haustið 2021. Styrmir segir að frá og með næsta hausti fari kosningaundirbúningur að setja mark sitt á starf flokkanna.
„Landsfundur Sjálfstæðisflokksins verður næsta haust og undirbúningur prófkjöra hjá flokkunum mun einkenna starf þeirra í vaxandi mæli frá og með sumarlokum,“ segir hann og bætir við að líklegt sé að efnahagslegar afleiðingar kórónuveirunnar muni setja mestan svip á kosningabaráttuna. Fleiri mál verði þó í deiglunni.
„Það vakti athygli þeirra, sem fylgdust með fundarhöldum Ögmundar Jónassonar og Gunnars Smára Egilssonar um kvótakerfið og sjávarútvegsmálin almennt, hversu fjölsóttir þessir fundir voru, bæði sá, sem var í Þjóðmenningarhúsinu fyrir nokkrum mánuðum og þeir sem voru út á landi. Mikil aðsókn að fundum þeirra bendir til að í grasrótinni sé að búa um sig megn óánægja með óbreytta stöðu mála.“
Þá nefnir Styrmir að Jón Baldvin Hannibalsson, fyrrverandi formaður Alþýðuflokksins, hafi vakið athygli á þeirri leið sem Alaskabúar hafa farið vegna nýtingar auðlinda í almannaeigu. Taka þeir gjald fyrir nýtingu þeirra sem rennur í sérstakan sjóð sem greiðir út til íbúa ár hvert.
„Líklegt má telja að einhver flokkanna taki þessar ábendingar Jóns Baldvins upp, sem gæti leitt til mikilla umræðna um þennan málaflokk og haft áhrif á úrslit kosninganna. Það gæti því vel farið svo að næstu kosningar verði sögulegar.“
