„Sveitarfélögin í landinu eru einfaldlega of mörg, sem þýðir margfalda yfirbyggingu, bæði vegna þess að kjörnir fulltrúar í sveitarstjórnum eru margfalt fleiri en þeir þyrftu að vera og þá jafnframt sveitarstjórar og aðrir starfsmenn.“
Þetta segir Styrmir Gunnarsson, fyrrverandi ritstjóri Morgunblaðsins, á bloggsíðu sinni. Þar gerir hann viðtal í Silfrinu á RÚV í gær við Kristrúnu Frostadóttur, aðalhagfræðing Kviku banka, að umtalsefni. Hann segir að einn þátt málsins hafi þó vantað í þær umræður, sú staðreynd að yfirbygging sveitarfélaganna er margföld á við það sem hún þyrfti að vera.
Styrmir segir að þetta komi skýrt fram á höfuðborgarsvæðinu og það liggi beint við að sameina Reykjavík, Seltjarnarnes, Mosfellsbæ og Kópavog í eitt sveitarfélag og Garðabæ og Hafnarfjörð í annað. Vissulega kæmi einnig til greina að Kópavogur sameinaðist Garðabæ og Hafnarfirði.
„Sá sparnaður, sem leiddi af slíkri sameiningu mundi ekki leysa fjárhagsvanda sveitarfélaganna en hann mundi hjálpa til og er sjálfsagður. Sömu rök eiga auðvitað við víða á landinu. Það eru engin efnisleg rök, sem mæla gegn slíkri sameiningu,“ segir Styrmir.
