Styrmir hefur á­hyggjur af stöðunni: „Það getur soðið upp úr“

Styrmir Gunnars­son, rit­stjóri Morgun­blaðsins frá 1972 til 2008, segir líkur á því að upp úr muni sjóða hér á landi áður en langt um líður.

„Á fyrstu tveimur ára­tugum lýð­veldisins var harka í á­tökum á vinnu­markaði á­berandi. Það mátti stundum ekki miklu muna að kæmi til handa­lög­mála. Á seinni hluta Við­reisnar­tímans varð breyting á. Þá skapaðist traust á milli stjórn­valda og verka­lýðs­hreyfingar,“ segir Styrmir á bloggsíðu sinni og bætir við að önnur slík þátta­skil hafi orðið með þjóðar­sáttar­samningunum tveimur ára­tugum síðar.

„Nú er aug­ljós hætta á að við hverfum í þessum skilningi til baka til fyrstu ára­tuga lýð­veldisins. Það er skollið á "for­dæma­laust" at­vinnu­leysi, sem á eftir að aukast. Krafan um hækkun at­vinnu­leysis­bóta fær litlar undir­tektir á hinum pólitíska vett­vangi að öðru leyti en því að lengja tíma­bil tekju­tengdra bóta,“ segir Styrmir sem bætir við að á sama tíma verði hjálpar­stofnanir varar við aukna eftir­spurn eftir mat og fatnaði fyrir börn.

„Fari svo fram sem horfir eru líkur á vaxandi hörku á vinnu­markaði. Verka­lýðs­fé­lög munu efna til úti­funda á Austur­velli. Það getur soðið upp úr.“