Leiguverð hér á landi hefur verið talsvert í umræðunni undanfarin misseri og sitt sýnist hverjum í þeim efnum. Til eru fjölmargar grúppur á Facebook þar sem hægt er að auglýsa íbúðir til leigu. Ein slík auglýsing í Facebook-grúppu þar sem auglýstar eru eignir í hverfum 101, 105 og 107 hefur vakið nokkra athygli.
Um er að ræða 23 fermetra stúdíóíbúð við Bergstaðastræti í miðborg Reykjavíkur og er leiguverðið 150 þúsund krónur á mánuði. Við þetta bætast 13 þúsund krónur fyrir aðgang að neti og notkun á vatni og rafmagni. Samtals 163 þúsund krónur. Af myndum að dæma virðist íbúðin vera undir súð á efstu hæð hússins.
Þó nokkrar athugasemdir hafa verið settar undir færsluna og í einni segir: „163 þúsund krónur fyrir 23 fermetra er hálfgerð græðgi, en græðgi er vinsæl á Íslandi.“ Annar bendir á að hann leigi 50 fermetra íbúð í miðborg Reykjavíkur og borgi fyrir hana 150 þúsund krónur á mánuði. Enn annar segir að þetta verð sé viðeigandi fyrir 50-60 fermetra íbúðir í miðborginni.
Dæmi hver fyrir sig en skjáskot úr auglýsingunni má sjá hér neðst í fréttinni:
Samkvæmt tölum Þjóðskrár Íslands hefur vísitala leiguverðs á höfuðborgarsvæðinu lækkað undanfarna mánuði. Samkvæmt nýjustu tölunum, sem birtust í lok apríl, var vísitalan fyrir mars 201,8 stig eftir að hafa farið í 204,5 stig í janúar.
Meðalleiguverð á hvern fermetra í mars í Reykjavík, á svæðinu vestan Kringlumýrarbrautar og á Seltjarnarnesi, var 4.606 krónur fyrir stúdíóíbúðir. Verðið lækkar á hvern fermetra eftir því sem íbúðirnar eru stærri. Þannig var það 3.247 krónur fyrir 2 herbergja íbúðir og 2.996 krónur fyrir 3 herbergja íbúðir.
Upplýsingarnar eru aðgengilegar á vef Þjóðskrár Íslands og byggjast þær á 527 leigusamningum sem þinglýst var í mars á þessu ári.
