„Strandveiðivertíðin hefur aldrei staðið eins stutt og árið 2022. Það verður að tryggja 48 daga á bát. Við viljum vekja athygli á því að eftir breytingar sem gerðar voru á árinu 2018 á strandveiðikerfinu þá hefur strandveiðiflotinn sl. 2 ár ekki fengið þá 48 daga á veiðum eins og vilji og loforð stjórnvalda stóðu til,“ svona hefst opið bréf stjórnar Strandveiðisfélagsinsí Fréttablaðinu í dag.
„Vertíðin sem stendur frá 1. maí til 31. ágúst var stöðvuð 20. ágúst árið 2020 þrátt fyrir að bætt hefði verið smáræði við kvóta. Vertíðin 2022 var stöðvuð þann 22. júlí sl. þrátt fyrir að smáræði hefði verið bætt við kvóta.
Engir 48 dagar. Í mesta lagi 36 – en enginn bátur náði því vegna brælu, rauðra daga, föstudagsveiðibanns o.fl.
Veiði var stöðvuð áður en vertíð lauk því veiðiheimildir eru svo naumt skornar að þær dugðu ekki. Sóknarmark (48 dagar) virkar nefnilega ekki með aflamarki (kvóta). Þú þarft að velja annað hvort. Það er tómt mál um að tala örugga 48 daga með aflamark (kvóta) og stöðvunarheimild sífellt yfirvofandi,“
Markmið breytinganna 2018 voru þessar:
Auka öryggi, koma í veg fyrir ólympskar veiðar og auka nýliðun.Ólympískar veiðar eru enn til staðar en nú á landsvísu en ekki svæðavísu.
„Þegar lítur út fyrir að vertíð ljúki rétt eftir miðjan júlí, byrjun ágúst þá byrjar kapphlaup. Þá byrja ólympískar veiðar og það er róið í vályndum veðrum. Sérstaklega á þeim svæðum þar sem fiskgengd kemur síðast því á þeim svæðum sjá menn fram á að fá nánast ekki neitt.
Frá 2018 hefur nýliðun verið nánast engin.
Enda er þetta kerfi byggt upp svipað og „Hunger Games“ og enginn vill taka þátt í þeim. Þetta borgar sig engan veginn nema þú sért svo heppinn að eiga bát fyrir.“
Þetta þýðir að á bilinu 6-700 lítilla fjölskyldufyrirtækja sem stunda umhverfisvænustu veiðarnar eru á barmi gjaldþrots, minni umsvif í brothættum sjávarbyggðum um land allt á fiskmörkuðum, fiskvinnslu og afleiddri verslun og þjónustu.
Hægt er að lesa bréfið í heild sinni hér.
