„Ég lít á þetta öðruvísi. Þegar maður býður sig fram þá er það bara til ákveðins tíma. Það er ekki sjálfstæð ákvörðun að bjóða sig ekki fram heldur sjálfstæð ákvörðun að bjóða sig fram“, segir Helgi Hrafn Gunnarsson þingmaður Pírata aðspurður af hverju hann ætli ekki að bjóða sig fram til áframhaldandi þingsetu að ári liðnu.
Helgi Hrafn er í viðtali í þættinum 21 á Hringbraut í kvöld, mánudag. Rætt var við hann frá heimil hans þar sem Helgi Hrafn greindist með Covid-19.
Helgi hefur verið Alþingismaður Pírata í Reykjavíkurkjördæmis norður frá 2013 til 2016 og aftur síðan 2017. Árið 2016 þegar stjórnin sprakk óvænt ákváð hann að fara ekki fram en ári síðar fór hann aftur á þing.
Hann segir sína persónulegu reynslu vera þá að það sé óhollt til lengdar að sitja á þingi.
„Alla vega persónulega, þá er mikilvægt að gera eitthvað annað líka. Þetta er átakastarf, það gleymist stundum að Alþingi er stofnun sem er hugsuð til þess að taka utanum átök og ágreining í samfélaginu um hvers skal ráða“, segir Helgi Hrafn og ennfremur þetta: „Það er ekki hollt umhverfi til lengdar fyrir manneskjur“, hann segir þetta sitt persónulega mat og að sjálfsögðu séu til þingmenn sem vilja starfa lengur en hann.
„Fyrir framboðið 2013 var ég afskaplega meðvitaður um það að þetta krefðist fórna og það er mikilvægt að fólk hafi það í huga þegar það býður sig fram, augljósasta dæmið fyrir okkur Píratana er að þú átt ekki mikið einkalíf“.
Ógeðslegt vegna valdanna
„Eðli stofnunarinnar, eðli Alþingis, eðli þess að búa í lýðræðissamfélagi er þannig að við þurfum einhvern veginn að takast á við ágreining, við það að fólk sé ekki sammála um það hvernig hlutirnir skuli gerðir og gerum það í lýðrðissamfélögum með því að hafa einhverja ramma, einhverja umgjörð þar um. Viðbjóðurinn sem kemur úr slíku valdabrölti – og það er þess vegna sem stjórnmál eru svona ógeðsleg er að þau fjalla um völd“, segir Helgi Hrafn.
Um hvað hann vill sjá gerast á sinni vakt sem þingmaður Pírata á þessum ári sem eftir er af kjörtímabilinu segir Helgi Hrafn margt en nefnir sérstaklega opna nefndarfundi Alþingis. Þar segist hann vilji snúa hlutum á haus og að fundirnir yrðu alltaf opnir og undantekningin væru lokaðir fundir. Gagnstætt því sem nú er.
„Ég er búinn að sitja á einhverjum tímapunkti fundi allra fastanefnda. Yfirþyrmandi meirihluti þeirra samanstendur bara af góðum aukapunktum í umræðunni sem fjölmiðlar hefðu gott af að heyra og almenningur hefði gott að hafa aðgang að, myndi fyrirbyggja alls konar misskilning, fyrirbyggja það að þingmenn séu að karpa um það í pontu hvað hafi gerst á einhverjum fundum“.
„Það ætti bara að hafa þetta opið langoftast“.
