„Það sýnir ágætlega yfirganginn í sértrúarsöfnuðinum sem kallar sig Stjórnarskrárfélagið hvernig hann bregst við því þegar þeir sem sjá um eignir Stjórnarráðsins þrífa burt krot af veggjum þess,“ segir í staksteinum Morgunblaðsins í dag.
Þar er fjallað um vegglistaverkið sem fjarlægt var af vegg við húsnæði sjávarútvegsráðuneytisins á Skúlagötu, tveimur dögum eftir að það var málað. Á veggnum var spurt hvar nýja stjórnarskráin væri.
Staksteinahöfundur Morgunblaðsins sýnir gjörningnum lítinn skilning eins og glögglega má lesa. Þar er Stjórnarskrárfélaginu fundið flest til foráttu og fær RÚV einnig væna pillu. Staksteinar Morgunblaðsins eru ekki merktir höfundi en Davíð Oddsson, fyrrverandi formaður Sjálfstæðisflokksins, er ritstjóri blaðsins sem kunnugt er.
„Óprúttinn veggjakrotari hafði málað slagorð um nýja stjórnarskrá á vegg sem hann átti ekki og án leyfis og þegar eigandinn þreif vegginn voru viðbrögð formanns Stjórnarskrárfélagsins að fordæma þrifin, ekki veggjakrotið!“
RÚV fær það reglulega óþvegið í staksteinum og er fréttaflutningur þess af málinu gagnrýndur.
„Athygli vakti líka að Ríkisútvarpið birti frétt um málið þar sem ríkisstofnunin kallaði þessi sjálfsögðu viðbrögð þeirra sem hafa umsjón með eignunum „þrifaæði“ í fyrirsögn. Þessi furðulega ríkisstofnun er auðvitað gengin í Stjórnarskrárfélagið og kemur út af fyrir sig ekki á óvart að þessir hópar sameinist, en hversu viðeigandi er það að skattfé sé notað til að afflytja fréttir af þrifum á eigum skattgreiðenda?“
Þá spyr staksteinahöfundur hvort eignaspjöll verði varin í nýju stjórnarskránni í stað eignaréttar.
„Stjórnarskrárfélagið er virðulegt nafn á sértrúarhópi sem hefur staðfest einkenni sín sem slíkur með því að birta myndskeið af fundi sínum þar sem fundargestir kyrja einhverja möntru um að þeir strjúki stórum ísmola blítt um leið og þeir ganga að honum og leggja hendur yfir hann. Fólk má vitaskuld leika sér með ísmola eins og því sýnist, þó að það verði ekki trúverðugra fyrir vikið, og það má berjast fyrir nýrri stjórnarskrá, en verða eignaspjöll varin í nýju stjórnarskránni í stað eignarréttarins eins og nú er?“
