Stein­grímur hitti stór­stjörnu á Spáni: Sann­leikurinn kom ekki í ljós fyrr en í lok sam­talsins

Stein­grímur Sæ­varr Ólafs­son, al­manna­tengill og fyrr­verandi frétta­stjóri, rifjar upp skemmti­lega sögu af því þegar hann hitti stór­stjörnu á sund­laugar­barnum við hótel sem hann dvaldi á á Benidorm.

„Fimm ár upp á dag síðan ég sá og hitti Luis Figo, gamla portúgalska knatt­spyrnu­goðið sem spilaði með Bar­ca og Real Madrid, á hótelinu þar sem ég gisti á Benidorm. Sá hann hinu megin við sund­laugina þar sem hann spíg­sporaði á bakkanum,“ segir hann.

Stein­grímur er mikill knatt­spyrnu­unnandi og fylgdist hann vel með portúgalska snillingnum, enda ekki á hverjum degi sem maður deilir sund­lauga­garði með stór­stjörnu. „Al­þýð­legur maður hann Figo. Lék sér við börnin sín, fór í sund­laugina og virtist af­slappaður. Al­þýð­legur maður að vera svona með okkur pöpulnum á sólar­ströndu. Figo er maður fólksins. Svo sá ég hann skjótast á sund­laugar­barinn og ég vissi að þarna var tæki­færið mitt,“ segir hann.

Stein­grímur segir að hann hafi nánast hlaupið á barinn, uns hann stóð við hlið Figo. „Hann leit til hliðar, ég leit á móti og við kinkuðum kolli hvor til annars...svona eins og menn gera hlið við hlið á barnum. Bar­þjónninn kom að af­greiða og ég benti á Figo, svona „hann­varáundan­mér“ bending. Figo var á­nægður, þakkaði mér fyrir og ég svaraði að sjálf­sögðu kurteis­lega eins og Ís­lendinga er siður í út­löndum.“

Ekki leið á löngu þar til Stein­grímur og Figo voru farnir að tala um um allt milli himins og jarðar: Veðrið, hótelið og Spán svo eitt­hvað sé nefnt. Stein­grímur segist hafa skipu­lagt næstu leiki fram í tímann í huganum. „Ég myndi rífa upp gamla VISA nótu og láta hann á­rita hana og henda síðan símanum mínum í bar­þjóninn og láta hann taka mynd af okkur fé­lögunum. Ég og Figo. Við vinirnir að fá okkur öllara á Spáni.“

Stein­grímur segir að næsta skref hafi verið að fyrir­tæki hans, Sæ­varr slf. tæki að sér PR störf fyrir Figo – að minnsta kosti á Ís­landi.

„Mér fannst ég hins vegar verða að kynna mig áður en ég bæði um á­ritun og hvað þá mynd, og með þá vit­neskju í far­teskinu að út­lendingar eiga afar erfitt með að segja: „Stein­grímur Sæ­varr Ólafs­son“ þá rétti ég bara fram lúkuna og sagði „Denni“. Figo tók í hendina á mér og svaraði að bragði „Alber­to“.

Stein­grímur segir að Luis Figo, hinn eini sanni, hafi væntan­lega verið á ein­hverri lúxus­snekkjunni í Mið­jarðar­hafinu þegar sam­talið fór fram. „En Alber­to Gonza­les, raf­virki frá Valencia, var með mér á hótelinu á Benidorm. Sæ­varr slf. getur hins vegar mögu­lega plöggað Alber­to ef ein­hvern vantar raf­virkja á Valencia svæðinu...“