Stefán Ingvar Vigfússon, sendir Willum Þór Þórssyni heilbrigðisráðherra pillu í nýjumbakþönkum sínum í Fréttablaðinu í dag eftir að ráðherra ákvað að fresta frumvarpi sínu afglæpavæðingu fíkniefna og stofna um það starfshóp.
„Ég er mjög heppinn. Ég er heppinn að hafa aldrei verið handtekinn með fíkniefni, þegar ég neytti þeirra. Ég er heppinn að hafa haft löngun til þess að hætta neyslu þeirra. Ég er heppinn að hafa haft öruggt húsnæði á meðan ég beið eftir því að komast inn á Vog og ég er heppinn hafa ekki þurft að bíða lengi. Ég er heppinn að hafa haft stuðning foreldra minna þegar ég útskrifaðist þaðan. Þessi heppni heitir öðru nafni forréttindi,“ skrifar Stefán.
„Ég þekki fólk sem er ekki eins heppið, fólk sem er í dagneyslu fíkniefna og hefur ekki allan þann stuðning sem ég hafði til þess að verða edrú. Fólk sem hefur mátt þola harðræði og orðið fyrir áföllum sem það deyfir með neyslu. Þetta fólk má ekki vera til á Íslandi, það er ólöglegt. Þegar þau óska eftir læknisaðstoð hjá neyðarlínunni er lögreglan gjarnan send á staðinn, lögreglan sem þau óttast. Lögreglan sem tekur af þeim efnin þeirra, lögreglan sem læsir þau inni. Þetta fólk má ekki vera til,“ bætir hann við.
Þeir sem glíma við fíkn þurfa því að forðast lögregluna til ársloka þar sem frumvarp Willums verður ekki lagt fram fyrr en á haustþingi.
„Niðurstaða ríkisstjórnarinnar er sú að það er of flókið mál, með því meina þau auðvitað að þeim er sama. Þeim er sama um þetta fólk sem má ekki vera til. Og í vikunni frestaði heilbrigðisráðherra nýju frumvarpi um afglæpavæðingu neysluskammta fram á haust. Vorið er nýgengið í garð. Þetta fólk sem ekki má vera til má bíða þangað til. Kannski fá þau einn daginn fulltrúa í ríkisstjórn. Kannski. Núverandi heilbrigðisráðherra er í öllu falli skítsama um heilbrigði þeirra,“ skrifar Stefán að lokum.
