Rithöfundurinn Stefán Máni Sigþórsson hefur verið í jákvæðnisgír á Twitter-síðu sinni í byrjun nýs árs og hreinlega dælt út hrósum.
Færsla sem hann birti á Twitter-síðu sinni í gær hefur vakið talsverða athygli en þar hrósar hann grínistanum Hjálmari Erni Jóhannssyni. Hjálmar Örn er mörgum að góðu kunnur og hefur hann meðal annars brugðið sér í hlutverk hvítvínskonunnar. Þá heldur hann úti vinsælu hlaðvarpi, Hæ Hæ, ásamt Helga Jean Claessen.
Í færslu sinni segir Stefán Máni að frænka hans hafi eitt sinn auglýst eftir hjálp við flutninga á Facebook. Bætir hann við að Hjálmar hafi svarað kallinu, mætt á staðinn og það þrátt fyrir að hann þekkti hana ekki neitt.
„Hann fékk feitt prik í kladdann hjá mér og ég hef haft mikið álit á honum allar götur síðan,“ segir hann meðal annars.
Hjálmar Örn þakkaði fyrir hrósið í athugasemd undir og sagði einfaldlega: „Takk besti“
Eini sinni auglýsti frænka mín eftir hjálp við flutninga á Facebook. @hjammi mætti, þó að hann þekkti hana ekki neitt. Hann fékk feitt prik í kladdann hjá mér og ég hef haft mikið álit á honum allar götur síðan.
— Stefán Máni (@Stefan_Mani_) January 9, 2023
