Stefán: Andfélagsleg hegðun að láta ekki bólusetja sig

„Það að geta látið sprauta sig en kjósa að gera það ekki er í raun mjög and­fé­lags­leg hegðun,“ segir Stefán Páls­son sagn­fræðingur.

Stefán deilir við­tali Björns Inga Hrafns­sonar hjá Viljanum við Brynjar Níels­son, þing­mann Sjálf­stæðis­flokksins, þar sem hann lýsir meðal annars þessari skoðun sinni.

Brynjar hefur farið mikinn í um­ræðunni um CO­VID-19 en í við­talinu við Björn Inga sagðist hann ekki ætla að láta bólu­setja sig gegn veirunni á næsta ári þó flest bendi til þess að bólu­efni verði klárt innan fárra mánaða. Sagðist Brynjar velta því fyrir sér hvort ekki væri skyn­sam­legra að fara svo­kallaða hjarðó­næmis­leið í bar­áttunni.

Stefán gefur lítið fyrir þetta en hann segir í færslu sinni:

„Einu sinni var ég ungur og vit­laus og hugsaði með mér: ég af­þakka flensu­sprautur, því ég er á­gætur til heilsunnar og ekkert of góður til að veikjast. Betra að skilja eftir bólu­efnið fyrir þá heilsu­veilu!,“ segir Stefán og bætir við að síðan hafi ein­hver út­skýrt fyrir honum far­aldurs­fræði og hjarðó­næmi.

„Þú lætur sprauta þig - ekki bara til að losna sjálfur við að verða veikur heldur til að vernda aðra. Með því að bólu­setja þig hjálparðu til við að mynda varnar­hjúp um þá sem eru með veiklað ó­næmis­kerfi og geta mögu­lega ekki látið bólu­setja sig. Það að geta látið sprauta sig en kjósa að gera það ekki er í raun mjög and­fé­lags­leg hegðun.“

Stefán segir að þetta hafi hann ekki fattað fyrr en það var út­skýrt fyrir honum. Hann kveðst því ekki vera í neinni að­stöðu til að hneykslast á öðru full­orðnu fólki sem áttar sig ekki á því hvernig hjarðó­næmi virkar. Stefán endar pistil sinn á léttu skoti á Brynjar Níels­son.

„En það er ó­neitan­lega ó­heppi­legt að sama fólk telji sig hafa mikið til málanna að leggja í um­ræðum um við­brögð við heims­far­aldri og grípi jafn­vel sjálft til hug­taksins hjarðó­næmis í því sam­bandi.“