Héraðsdómur Reykjavíkur hefur dæmt karlmann í 60 daga skilorðsbundið fangelsi fyrir þjófnað.
Maðurinn var ákærður fyrir að hafa, þann 30. desember 2019, stolið buxum að verðmæti 8.900 krónur í verslun Arctic Explorer í Bankastræti. Þann 3. júlí á síðasta ári stal maðurinn svo skóm að verðmæti 4.798 krónur úr Toppskónum Outlet við Vínlandsleið.
Maðurinn játaði brot sitt skýlaust fyrir dómi en hann hefur einu sinni áður komist í kast við lögin. Það var í mars 2018 þegar hann og félagi hans stálu fimm vínflöskum af bar á Hótel Marina við Mýrargötu í Reykjavík. Fyrir þann þjófnað hlaut hann 30 daga skilorðsbundinn fangelsisdóm.
Til refsiþyngingar var litið til þess að um ítrekun við framangreindan dóm var að ræða. Þótti hæfileg refsing 60 dagar í fangelsi, en fullnustu refsingarinnar er frestað haldi maðurinn skilorð í tvö ár.
