Hagfræðingurinn Nanna Hermannsdóttir spyr hvers vegna Sjálfstæðismenn séu ekki brjálaðir yfir því að forysta flokksins hafi ekki endurnýjað umboð sitt síðan 2018, þrátt fyrir að kosningar eigi að fara fram á tveggja ára fresti.
„Forysta Sjálfstæðisflokksins hefur ekki endurnýjað umboð sitt síðan 2018, þrátt fyrir að kosningar eigi að fara fram á 2 ára fresti. Hvernig í andskotanum eru sjallar ekki brjálaðir og afhverju er enginn fjölmiðill að fjalla um hvað þetta sé galið?“ spyr Nanna í röð tísta á samfélagsmiðlinum Twitter.
„Getiði ímyndað ykkur ef þetta væri land utan Evrópu? Flokksfólk myndi nú eitthvað láta heyra í sér um spillingu, skort á lýðræði og einræðistilburði,“ segir hagfræðingurinn.
„Sé fyrir mér fyrirsagnir fjölmiðla: “Formaður flokksins í langtíburtistan framlengir stjórnartíð sína um tvö ár, felur sig á bakvið fjöldatakmarkanir vegna Covid.“
Aðrir flokkar hafi haldið landsfundi í Covid
Hún bendir á að flokkar með miklu minna fjármagn en Sjálfstæðisflokkurinn hafi getað haldið landsfundi í heimsfaraldrinum.
„Flokkar með miklu minna fjármagn á bakvið sig en Sjálfstæðisflokkurinn gátu haldið landsfundi í Covid ~á internetinu~. Það er kannski ekki ideal, en væntanlega betra en ekkert? Allavega kjósa forystuna?“
