Sólveig Anna Jónsdóttir, formaður Eflingar, gagnrýnir Katrínu Jakobsdóttur forsætisráðherra fyrir að birta mynd af sér í gærkvöldi skælbrosandi þar sem hún fagnar Englandsmeistaratitli Liverpool. Bendir Sólveig á að nokkrum klukkustundum áður hafi orðið alvarlegur eldsvoði í miðborginni, en eins og greint var frá í morgun létust þrír í brunanum.
Í færslu sinni í gærkvöldi óskaði Katrín liðsmönnum Liverpool, eða „strákunum mínum“ eins og hún orðaði það til hamingju með titilinn. Hún skrifaði á ensku: „Finally! Congratulations my dear boys and Klopp and to us all! Lets all remember to keep walking on with hope in our hearts!“
„Kannski er óviðeigandi af mér að vera að pæla í þessu eða skrifa um þetta hér en ég ætla samt að gera það. Að sjálfsögðu má forsætisráðherra skrifa færslu á Twitter um áhugamál sín en í ljósi atburða gærdagsins hefði verið eðlilegra að háttsettasta stjórnmálamanneskja lýðveldisins skrifaði færslu um þann harmleik sem átti sér stað, ef hún á annað borð var að nota Twitter,“ segir Sólveig Anna á Facebook.
Hún heldur áfram:
„Mér finnst ekki við hæfi að forsætisráðherra birti færslu um fótboltaleik þegar að fólk er slasað og í lífshættu eftir skelfilegan eldsvoða, en þannig var staðan í gærkvöldi, og þegar slökkviliðsfólk hefur lagt sig í mikla hættu við að reyna að bjarga þeim sem föst voru inn í húsinu. Ég tel að það væri betra og raunverulega við hæfi eftir atburði sem þessa að fólk sem fer með völd léti okkur vita að það skildi að undir fallegu yfirborði þessa lands eru skelfileg samfélagsleg vandamál sem hafa fengið að grassera meira og minna óáreitt. Það er svo löngu tímabært að það gerist.“
Sólveig Anna segir að í okkar norræna velferðarsamfélagi sé fullt af jaðarsettu fólki sem lifir í veröld þar sem allt önnur lögmál gilda en þau sem talað er fjálglega um við öll opinber tækifæri.
„Þetta fólk á það líka skilið að ráðamanneskjur hér viðurkenni tilvist þeirra. Fólkið í óíbúðarhæfu húsunum og iðnaðarhúsunum þarf mest á því að halda af öllum að með þeim sé staðið af þeim sem geta sannarlega breytt samfélaginu, og tilvera þeirra gerð mannsæmandi og góð. Aðbúnaður sá sem þessu fólki er boðið upp á er til skammar fyrir valdastéttina,“ segir Sólveig Anna en margir félagsmenn Eflingar er aðflutt verkafólk.
Sólveig segir að skilyrðin sem farandverkafólki eru búin á íslenskum vinnumarkaði séu til skammar fyrir valdastéttina. Þá tekur hún undir orð Drífu Snædal, forseta ASÍ, sem sagði að meira púður færi í að elta uppi verkafólk en taka á glæpamönnum og óheiðarlegum atvinnurekendum sem nýta sér bága stöðu erlends verkafólks.
„Sérstakur bíll fer um og hrellir jaðarsetta verkamenn á meðan að atvinnurekendur sem nýta sér bága stöðu þessa hóps fá bókstaflega frítt spil. Þess vegna leyfi ég mér hér að gagnrýna myndbirtinguna og áhersluna sem hún sýnir. Ég er komin með nóg af yfirborðskenndri stemmningu um að við séum öll í þessu saman og að allt sér hér frábært. Ég vil að við fókuserum á og tölum um það sem máli skiptir. Það er löngu tímabært.“
