Sólveig Anna Jóndóttir, formaður Eflingar og Vilhjálmur Birgisson, formaður Starfsgreinasambandsins fóru í hart á samfélagsmiðlum í dag en þar saka Vilhjálmur Sólveigu um rógburð. „Segðu mér Sólveig, hvað gengur þér til með þessum rógburði,“ spyr Vilhjálmur á Facebook-síðu Sólveigar.
Sólveig Anna skaut á Vilhjálm í færslu í morgun þar sem hún sagði að „leiðtogafærni og herkænska“ forystu Starfsgreinasambandsins héldi áfram að opinberast. Tilefnið var frétt í Morgunblaðinu í dag þar sem haft var eftir Vilhjálmi að verkfall og verkbann væru einn og sami hluturinn. Formenn þriggja verkalýðsfélaga teldu þar að auki að reglugerðir félaganna gerðu ráð fyrir því að vinnudeilusjóðir taki hvort tveggja til verkfalls og verkbanns.
„Nú láta stóru stjórar Starfsgreinasambandsins eins og verkfall og verkbann sá bara alveg nákvæmlega það sama,“ sagði Sólveig Anna í færslu sinni og bætti við:
„Og að af því leiði að auðvitað sé það verkefni Samtaka atvinnulífsins að ráðstafa fjármunum vinnudeilusjóða verkalýðsfélaga landsins eins og þeim lysti. Og að ekkert eigi að standa í vegi fyrir því að Samtök atvinnulífsins rústi möguleikum verkalýðsfélaga til að geta staðið undir verkföllum með því að tæma vinnudeilusjóði vinnuaflsins. Allra síst forysta sjálfra félaganna,“ sagði Sólveig Anna sem klykkti út með eftirfarandi orðum:
„Mikið er verkafólk heppið með þetta einvalalið framsýnna formanna sem skilja hvaða skilaboð er mikilvægt að senda í gegnum Morgunblaðið þegar harðar vinnudeilur standa yfir.“
„Hvað gengur þér eiginlega til?“Vilhjálmi þykir að sér vegið og skrifar hann langa færslu undir færslu Sólveigar þar sem hann svarar henni fullum hálsi.
„Ég er spurður hvaða rétt mínir félagsmenn eigi ef til verkbanns kæmi af hálfu atvinnurekenda. Ég svara fjölmiðlum eins og reglugerð vinnudeilusjóðs kveður á um og hefur verið samþykkt á aðalfundi félagsins sem er æðsta vald félagsins,“ segir Vilhjálmur sem vitnar í reglugerð Vinnudeilusjóðs Verkalýðsfélags Akraness þar sem hann er formaður.
Í þeirri reglugerð kemur fram að tilgangur sjóðsins sé að styrkja fullgilda félagsmenn sem standa í verkfalli eða verkbönnum af atvinnurekendum á félagssvæðinu og hljóta af því launatap.
„Ertu virkilega að ætlast til þess að ef ég er spurður um réttindi félagsmanna VLFA ef til verkbanns kæmi á meðal minna félagsmanna að ég segi bara ósatt og það í andstöðu við samþykktir æðsta valds félagsins? Hvað gengur þér eiginlega til? Er ekki nóg að þið hafið reynt að eyðileggja kjarasamningsviðræður sem þið áttuð ekki aðild að með því að leka trúnaðarupplýsingum sem ég trúði ykkur fyrir á lokametrum kjarasamningsviðræðna SGS við SA. Allt til þess að reyna að senda rangar og villandi upplýsingar um innihald þess samnings sem við vorum að gera.“
Talar um stanslausar árásir
Vilhjálmur heldur áfram og spyr hvort það hafi ekki líka verið nóg að stjórn Eflingar hafi reynt að hafa neikvæð áhrif á kosningu og kjarasamning Starfsgreinasambandsins með því að senda ályktun, nánast á sömu mínútu og kosning um kjarasamning hófst, og reyna þannig að fá samninginn felldan.
„Þessar stanslausu árásir undir þinni forystu mistókust enda var samningurinn samþykktur með upp undir 90% þeirra sem kusu. Er ekki líka nóg að þið hafið ráðist á SGS með auglýsingaherferð sem hefur kostað milljónir ef ekki tugi milljóna.“
Vilhjálmur segir það hafa verið ákvörðun Eflingar að vilja semja ein og sér og vera ekki í samfloti með öðrum stéttarfélögum. Efling hafi ætlað að semja á eigin forsendum.
„Ég sagði við þig á sínum tíma að ég virði þá niðurstöðu að þið vilduð semja algerlega ein og sér enda liggur frjáls samningsréttur hvers félags hvellskýr fyrir. Sú ákvörðun var og er á ykkar ábyrgð en ég ítreka að 18 aðildarfélög SGS eru búin að semja og leggja þá niðurstöðu í dóm okkar félagsmanna og niðurstaðan var skýr eins og áður hefur komið fram.
Þessar árásir þínar sem byggjast á að ata mig og 18 aðildarfélög SGS auri eru þér til ævarandi skammar,“ segir Vilhjálmur sem biðlar til Sólveigar Önnu að láta aðildarfélög Starfsgreinasambandsins í friði og einblína á að tryggja kjarasamning handa sínum félagsmönnum.
„Bara þannig að því sé haldið til haga strax þá mun ég ekki svara „virkum í athugasemdum“ hvað þetta svar mitt varðar!,“ sagði Vilhjálmur að lokum.
