Sólveig Anna Jónsdóttir, formaður Eflingar, fékk seinni Pfizer-sprautuna í gær. Segja má að hún hafi farið í súrrealískt ferðalag í kjölfarið þar sem vatnsrennibrautir komu nokkuð við sögu.
„Ég fékk seinni Pfizer sprautuna í gær. Og þvílíkt kvöld og nótt sem ég átti. Byrjaði með léttum undarlegheitum í augum. Svo tók við mikið kvef í nokkra tíma. Þá kom hæsi og svo innri hitabylgja sem fjaraði út þegar kaldari vindar tóku að blása. Á meðan ágerðust sífellt ýmsir beinverkir; í hnjám og öxlum en svo fyrst og fremst mikill beinverkjaákafi í mjaðmagrind, spjaldhrygg og rófubeini,“ segir hún.
Hún segir að eiginmaður hennar, Magnús Sveinn Helgason, hafi stungið upp á því fljótlega að þau færu snemma að sofa sem þau og gerðu.
„Eftir að ég sofnaði vaknaði ég fljótlega og höfðu þá beinverkir að mestu horfið en í stað þeirra miklir magaverkir og hiti í fótum. Ég vakti og svaf til skiptis og hafði ólgandi draumfarir, aðallega um vatnsrennibrautir en á þeim hef ég mikla óbeit. Þessum draumförum fylgdi ákafur munnþurrkur og þorsti,“ segir hún.
Í færslu sinni á Facebook í morgun tók Sólveig Anna fram að hún væri með æðisgengnar harðsperrur í aftari hluta líkamans og hnjám. Segir hún engu líkara en að hún hafi hlaupið aftur og aftur upp stiga til að geta rennt sér niður vatnsrennibraut líkt og raunin var í drauminum.
Sólveig Anna hvatti fylgjendur sína til að segja frá ef þeir könnuðust við lýsingar hennar. Skemmst er frá því að segja að margir þeirra könnuðust við líkamlegu einkennin þó vatnsrennibrautir hafi að vísu ekki komið við sögu hjá þeim.
