Sólveig Anna Jónsdóttir, formaður verkalýðsfélagsins Eflingar, kallar eftir því að starfsfólk leikskóla fái strax greiddar álagsgreiðslur en frá morgundeginum er skólahald lagt niður á öllum skólastigum utan leikskóla. Leikskólar starfa áfram með óbreyttum hætti þrátt fyrir hertar sóttvarnaaðgerðir.
„Starfsfólk leikskólanna er ómissandi starfsfólk. Sannleikurinn er að þau eru í hópi þeirra allra mest ómissandi. Ómissandi og ómetanleg. Og þurfa nú að halda áfram að mæta, óbólusett á launum sem endurspegla áhugaleysi valdastéttarinnar á högum þeirra, halda áfram að standa sína plikt,“ skrifar Sólveig Anna á Facebook.
Hún leggur fram þá afdráttarlausu kröfu að starfsfólk leikskóla fái „myndarlega álagsgreiðslu“ frá borg og sveitarfélögum. Með því geti þau sýnt að þau skilji hve mikilvæg þessi störf eru og að samfélagið komist ekki af án þeirra.
„Þetta eru mest konur og stór partur þeirra tilheyrir þeim hópi sem einna lægst launin hefur á íslenskum vinnumarkaði. Álagið á leikskólunum var gríðarlega mikið áður en faraldurinn nam hér land en hefur verið tryllingslegt síðasta ár,“ skrifar Sólveig Anna.
