„Ég væri til í að fara hvert sem er, bara til að lina þjáningarnar,“ segir Soffía Káradóttir í samtali við Fréttablaðið í dag.
Fréttablaðið greinir í dag frá skipun verkefnastjórnar sem á að meta tillögur starfshóps um gæðamál tengd liðskiptaaðgerðum. Willum Þór Þórsson heilbrigðisráðherra kveðst binda miklar vonir við vinnu hópsins en hópurinn er meðal annars skipaður fulltrúum frá Landspítala, Sjúkrahúsinu á Akureyri, Heilbrigðisstofnun Vesturlands og Klíníkinn. Á hópurinn að ná heildrænt utan um þá áskorun sem felist í að stytta biðlista eftir liðskiptaaðgerðum.
Blaðið ræðir við Soffíu sem búsett er í Reykjavík en var ráðlagt að fara á biðlista á Akureyri, því þar væri biðin ekki nema rúmt ár, samanborið við tvö til þrjú ár í Reykjavík.
„Mér finnst frábært að geta farið á biðlista á Akureyri en fáránlegt að það sé ekki löngu búið að semja við Klíníkina, en það hefur verið pólitískt mál,“ segir Soffía.
Hún sé tilbúin að fara hvar sem er í aðgerð, í Reykjavík, á Akureyri eða Akranesi. „Ég væri til í að fara hvert sem er, bara til að lina þjáningarnar.“
Soffía hefur farið vikulega til sjúkraþjálfara síðustu fjögur árin og heimsækir bæklunarlækni á sex til átta vikna fresti. „Eftir aðgerð á öðru hnénu bíður aðgerð á hinu því það er bara ekki alveg eins slæmt,“ segir hún og spyr hvort setja eigi málið í nefnd og láta það gleymast.
„Úrræðin eru alveg til staðar og sumt er hægt að gera strax og annað þarf að bíða en það þarf bara að létta á þessu, koma fólki út í atvinnulífið og svoleiðis,“ segir Soffía.
