„Um þessar mundir má sjá óvenju mikinn fjölda karlrekla á birkitrjám á höfuðborgarsvæðinu og getur það verið vísbending um að óvenjumikið verði um birkifrjó í byrjun sumars,“ segir Steinn Kárason, garðyrkjufræðingur og umhverfisfræðingur, í aðsendri grein í Morgunblaðinu.
Í grein sinni bendir Steinn á að Birki vaxi um allt land og sé raunar ena innlenda trjátegundin sem myndar samfellda skóga. Frjótíminn hefst að jafnaði í maí en það fer þó nokkuð eftir landshlutum og tíðarfari. Það stendur yfirleitt í tvær til þrjár vikur og er háð úrkomu, veðri og vindum.
Eins og Steinn bendir á eru vísbendingar um að mikið verði um birkifrjó í byrjun sumars.
„Kenningin er því sú að ef veður haldist þurrt og hlýtt með hægum vindi megi spá óvenju miklu magni birkifrjóa. Mikið frjómagn getur leitt af sér mikla og góða frjóvgun og mikla og góða uppskeru á birkifræi í haust,“ segir hann en birkifrjó eru einnig skæður ofnæmisvaldur eins og fjölmargir Íslendingar sem þjást af frjókornaofnæmi eflaust vita.
„Auk birkifrjósins eru á Íslandi einkum tvær gerðir frjókorna sem koma af stað ofnæmi, en það eru grasfrjó og súrufrjó. Frjóofnæmi er mjög algengt vandamál sem fer vaxandi hjá ungmennum fram að tvítugsaldri en dregur úr eftir tvítugt. Sjaldgæft að fólk fái einkenni frjóofnæmis í fyrsta sinn eftir fertugt. Samkvæmt niðurstöðum úr íslenskri rannsókn sýnir u.þ.b. 4% fólks næmi fyrir trjám. Slagviðri getur þó sett strik í reikninginn og dregið úr frjómagni í lofti og hamlað fræuppskeru,“ segir Steinn og bætir við að sveppir og mygla geti einnig herjað á rekla birkisins þegar þeir taka að þroskast.
Annarskonar óværur geta einnig sett strik í reikninginn, til dæmis birkihnúðmý, birkifeti, birkiþéla, birkikemba og ryðsveppir.
Á Vísindavefnum má lesa um frjókornaofnæmi.
