Blaðamennirnir Þórður Snær Júlíusson og Arnar Þór Ingólfsson segjast báðum hafa brugðið við að lesa ummæli bloggarans Páls Vilhjálmssonar frá því í apríl 2022. Ummælin vegi að persónulegum og faglegum heiðri þeirra. En Páll sakaði þá um að eiga aðild að byrlun og stuldi síma skipstjórans Páls Steingrímssonar. Þetta kom fram í skýrslutöku í aðalmeðferð ærumeiðingarmáls blaðamannanna gegn Páli Vilhjálmssyni í morgun, enFréttablaðið greinir frá.
„Það hefur verið stanslaust skrifað og ýmislegt gefið í skyn. Þegar það var beinlínis sagt að við hefðum tekið þátt í glæp var mér nóg boðið,“ sagði Arnar Þór sem fyrstur gaf skýrslu.
„Mér var brugðið, ég viðurkenni það. Og er ég nú ýmsu vanur,“ sagði Þórður sem kom á eftir og svaraði spurningum lögmanns síns, Vilhjálms H. Vilhjálmssonar.
Páll gaf ekki skýrslu og lögmaður hans, Sigurður G. Guðjónsson, spurði blaðamennina að engu.
Báðir höfnuðu Þórður og Arnar að hafa nokkra aðkomu að umræddum meintum glæp. Þórður sagði þetta samsæriskenningu sem Páll viðhefði um sig og kollega sína. Væri þessi samsæriskenning tekin upp af meginstraumsfjölmiðlum, svo sem Morgunblaðinu og þættinum Bítinu á Bylgjunni, og fjallað um þetta eins og hefðbundna þjóðfélagsumræðu. Það tæki tíma og orku að útskýra fyrir fólki að þetta ætti enga stoð í veruleikanum.
Vilhjálmur spurði blaðamennina um yfirheyrslu lögreglunnar í ágúst síðastliðnum. Þeir svöruðu báðir að rannsóknin lyti að brotum á 228. og 229. greinar hegningarlaga, það er brotum gegn einkalífi. Ekki að byrlun né símastuldi. Þórður sagði að í málinu hefði komið fram að skýrsla réttarmeinafræðings sýndi að ekki væri hægt að sína fram á að Páli Steingrímssyni hefði verið byrlað.
Rannsóknin stendur enn yfir og sagði Arnar að þeir hefðu óskað eftir því að henni yrði flýtt.
Þórður sagði Páli Vilhljámssyni hefði verið boðið að leiðrétta ummæli sín, án þess að þurfa að greiða nokkuð, en því hafi verið hafnað.
