Huga þarf að afleiðingum þess að deila út fé úr ríkissjóði, segir Indriði H. Þorláksson fyrrverandi ríkisskattstjóri.
Indriði, fyrrverandi ríkisskattstjóri, segir að huga verði að tekjuöflun ríkissjóðs og nota megi skattkerfið til þess líkt og eftir efnahagshrunið 2008.
Um aðgerðir ríkisstjórnarinnar til stuðnings atvinnulífinu og einstaklingum segir Indriði að sér lítist ágætlega á þær en setur fyrirvara um útfærslur á ýmsum sviðum, eins og hann orðar það í þættinum 21 í kvöld.
„Það er kannski skortur á að menn hafi gert sér grein fyrir hvaða markmið væru með þessu og sýn á ýmis grundvallaratriði eins og þegar menn afhenda fé úr ríkissjóði og hvaða viðtakendur þar eru og á hvaða forsendum það er gert og hvað er eðli og afleiðingar það hefur að deila út fé úr ríkissjóði“.
En eru markmiðin ekki skýr? Það er, að halda vinnusambandi við fólk á vinnumarkaði og halda fyrirtækjum á floti, eru markmiðin ekki skýr að því leyti?
„Það sem ég er kannski helst að benda á er að í svona aðgerðum, að styrkja úr ríkissjóði þá felst í því eignatilfærsla, menn eru að færa úr sameiginlegum sjóði almennings í hendur einhverra annarra en svo lengi sem það þjónar samfélagslegum markmiðum þá er ég alveg sammála því“, segir Indriði.
„En ég set fyrirvara ef þetta á að leiða til þess að taka úr ríkissjóði og byggja upp eignir í hendur annarra“.
En er það að gerast?
„Það gerist óhjákvæmilega, þú styrkir fyrirtæki með peningum úr ríkissjóði, þá kemur það bara fram á eignahlið þess fyrirtækis en þetta getur átt rétt á sér segjum til dæmis til að bjarga þjóðhagslega mikilvægum fyrirtækjum eða að halda uppi atvinnustigi en í öðrum tilvikum er alveg glöggt að menn hafa verið að misnota þetta“, bætir Indriði við og vísar í þau tilfelli þar sem stöndug stórfyrirtæki hafa nýtt sér hlutabótaleiðina eða ríkisstyrk fyrir uppsagnarfrstum.
„Þá fer þessi styrkur í hendur einhverra aðila sem eiga þessi fyrirtæki og hafa í sjálfu sér ekkert við þetta að gera“
Indriði gagnrýnir að úthlutun styrkst til fyrirtækja fylgi ekki skýr skilyrði.
„Í þessum reglum er ekkert skýrt til hverra þetta getur tekið og það er svoldið vafasamt að, í svona tilvikum að hafa það bara til þess hvort að menn telji sig eiga þetta skilið eða þeir séu verðugir eða ekki „
„Skilyrðin voru ekki nægilega skýr og þessi skilyrði verða ekki sett nema menn hafi svolítið skýra mynd af því til hvers þetta er og hvert sé markmiðið“, segir Indriði.
