Kristinn Hrafnsson, ritstjóri Wikileaks, fékk ábendingu um að hann ætti óuppgerða skuld við skattinn upp á 114 krónur. Kristinn greinir frá þessu á Facebook-síðu sinni.
Kristinn birti svo býsna skemmtilega orðaðan tölvupóst sem hann sendi netfanginu [email protected] þar sem hann segist hafa brugðið á það ráð að fá „svokallaða mannveru“ til að koma greiðslunni til skattsins, meðal annars í ljósi þess að bankar taka 120 krónur fyrir að millifæra greiðslur.
„Greiðslan er í formi svokallaðra mynta sem voru, ótrúlegt en satt, býsna algengar sem greiðslumiðlun áður en stafræn snilli okkar varð allsráðandi.“
Tölvupóst Kristins má sjá hér að neðan:
Tölvupóstur:
til: [email protected]
Kæri 85002
Ég þakka þér ábendinguna um að óuppgerð sé skattskuld upp á kr. 114,- vegna tilvísunar 2021012216350090115. Þar sem bankar taka (eðlilega) kr. 120,- fyrir að millifæra greiðslur brá ég á það ráð að fá svokallaða mannveru (sem tengist minni kennitölu) til þess að nota ferð og koma þessari greiðslu til ykkar í umslagi.
Greiðslan er í formi svokallaðra mynta sem voru, ótrúlegt en satt, býsna algengar sem greiðslumiðlun áður en stafræn snilli okkar varð allsráðandi.
Þessar myntir teljast víst enn lögaurar í landinu.
Þið ferlið þetta svo eftir ykkar hentugleik og sendið mér vinsamlegast greiðslukvittun og staðfestingu um fullnaðaruppgjör. Hún má mín vegna vera stafræn.
Með bestu kveðju,
2506625219
