Veita ætti eldri borgurum, fólki sem komið er yfir sjötugt, skattaafslátt í þrepum þannig að við 75 ára aldur yrðu allar launatekjur, lífeyrissjóðsgreiðslur og ellilífeyrir að fullu skattfrjáls.
Ole Anton Bieltvedt, samfélagsrýnir og dýraverndarsinni, setur fram þessa hugmynd í aðsendri grein í Fréttablaðinu í dag.
Ole Anton segir það vera réttlætismál og nýtt ákjósanlegt stig jafnréttis, milli hinna ýmsu hópa þjóðfélagsins, að eldri borgarar, sem hafi byggt upp þá innviði, sem allir landsmenn nýta og njóta, fái frið frá kröfugerð samfélagsins, og framlagi til þess, eftir hálfrar aldar framlag og þátttöku í uppbyggingu.
Eldri borgarar myndu áfram greiða fjármagnstekjuskatt af vaxtatekjum, arði af hlutabréfum eða verðbréfum og húsaleigutekjum.
Ole Anton vitnar í útreikninga Hagfræðistofnunar HÍ, sem sýni að tekjutap ríkisins vegna slíks skattaafsláttar næmi ríflega 20 milljörðum á ári þegar hann yrði að fullu kominn til framkvæmda, eða um 0,8 prósent af vergri landsframleiðslu.
Til samanburðar nefnir hann að hagnaður bankanna á fyrri helmingi ársins nam 32 milljörðum og áfengisgjaldið var yfir 20 milljörðum árið 2020. Hagnaður Samherja einn og sér færi langt með að duga fyrir afslættinum. Þá nefnir hann að hækka mætti bankaskattinn til að bæta úr tekjutapi ríkissjóðs.
Ole Anton miðar við að afslættinum yrði komið á í þrepum á fimm árum og því hefðu stjórnvöld fimm ár til að aðlagast breytingunni.
Að mati Ole Antons myndi skattaafsláttur af þessu tagi stuðla að betra heilsufari eldri borgara, sem gæti dregið úr kostnaði við heilbrigðisþjónustu.
