Guðný Magnúsdóttir leirlistakona hefur mikinn áhuga á listhandverki, hönnun og myndlist og ber hennar fallega og listræna heimili þess sterk merki. Í þættinum Matur og Heimili í kvöld heimsækir Sjöfn Guðnýju á heimili hennar í Hlíðunum og vinnustofu, Studio Úmbru, á Kársnesinu þar sem persónuleiki hennar í listrænni sköpun skín í gegn.
„Ég er mjög hrifin af tímalausri fallegri hönnun og samtímamyndlist. Líklega er stíllinn á mínu heimili frekar skandinavískur, módernískur og fúnkis, en ég er mjög hrifin af húsgögnum frá Bauhaus tímanum og tengi þau öðru yngra,“segir Guðný. Á heimili hennar má sjá mikið af fallegu handverki og hönnun sem fangar augað.
„Ég hef vissa ástríðu fyrir samtímamyndlist og á nokkur verk eftir ýmsa listamenn bæði íslenska og erlenda, sem mér finnst gaman að stilla saman og breyti upphengi eftir atvikum – milli ára.“ Guðný bjó í nokkur ár í Finnlandi og er mjög hrifin af finnskri hönnun og handverki. „Ég heillaðist af þeirra virðingu fyrir fallegum hlutum, hönnun og myndlist sem ég varð áskynja hvarvetna þar í landi,“segir Guðný og á heimili hennar má sjá hve mikið hún leggur upp úr að hafa vandað handverk kringum sig.
Guðný hefur mikla ástríðu fyrir að skapa úr leir og sækir innblástur í verk sín í myndlist, hönnun og sögu. „Einnig í áhrif náttúru, ferðalaga og umgengni við áhugavert fólk, hvort sem er í þá muni sem ég skapa sjálf eða hvernig ég skipulegg umhverfi mitt.“
Missið ekki af einstakri heimsókn Sjafnar á listrænt heimili fagurkerans og leirlistakonunnar Guðnýjar og vinnustofuna þar sem töfrarnir í sköpun og list gerast í þættinum Matur og Heimili í kvöld á Hringbraut.
Þátturinn er frumsýndur klukkan 19.00 og fyrsta endursýning er klukkan 21.00.
