Þingflokkur Sjálfstæðisflokksins fer nú hringinn í kringum landið til að hitta kjósendur og eru aðstoðarmenn, líkt og Brynjar Níelsson aðstoðarmaður dómsmálaráðherra, með í för.
Brynjar hefur verið duglegur að skrifa um ferðina á Facebook og oftar en ekki á kostnað samflokksmanna sinna.
„Ég er mjög óvinsæll hjá samferðamönnum í hringferðinni vegna skrifa minna hér á fésbókinni.Telja mig skaða ímynd þeirra með rakalausum þvættingi og lygum. Orka þeirra fer öll í að hefna sín á mér í stað þess að reyna að heilla kjósendur,“ skrifar Brynjar.
„Þau hafa mútað bílstjóranum til að þeyta bílflautuna í hvert sinn sem ég kem að rútunni í þeirri von að ég missi meðvitund. Mesti óþverraskapurinn var þegar ég var í pissustoppi skilinn eftir uppi á heiði í 45 metrum á sekúndu í hviðum. Sem betur fer bjuggu einhverjir afkomendur Eyvindar og Höllu þarna og komu mér til bjargar,“ skrifar Brynjar en eins og margir vita þá bregður Brynjar Níelssyni alveg einstaklega mikið.
„Rétt er að upplýsa að dómsmálaráðherra hefur rekið mig sem aðstoðarmann, sennilega í tíunda sinn á einu ári. En ég er svolítið eins og Sólveig Anna og hlusta ekkert á hann og fer bara mínu fram,“ skrifar Brynjar að lokum.
