Sjálfstæðisflokkurinn mælist með mest fylgi stjórnmálaflokka á Alþingi, eða 24,0%. Þetta er samkvæmt niðurstöðum nýrrar könnunar MMR. Fylgi flokksins er óbreytt frá síðustu mælingu MMR sem framkvæmd var í júnímánuði.
Samfylkingin mælist næst með 14,9% fylgi, eða tæplega tveimur prósentustigum meira en við síðustu mælingu. Píratar eru skammt á eftir, fylgi flokksins mælist nú 14,3% og minnkar um rúmt prósentustig frá síðustu mælingu. Viðreisn mælist með 10,0% fylgi og jókst það um rúmlega eitt og hálft prósentustig frá síðustu könnun.
Fylgi Vinstri grænna dalar frá síðustu könnun. Fylgi flokksins mælist nú 9,6% en mældist 10,8% í síðustu könnun. Miðflokkurinn mælist með 8,0% fylgi en var með 8,4% fylgi í síðustu könnun. Fylgi Flokks fólksins mælist nú 4,8% en var 4,0% í síðustu könnun. Þá mælist Sósíalistaflokkur Íslands nú með 3,4% fylgi en í síðustu könnun var fylgi flokksins 5,1%.
Stuðningur við aðra flokka mældist 2,2% samanlagt.
Stuðningur við ríkisstjórnina mælist nú 50,1% og jókst um rúmlega tvö prósentustig frá síðustu könnun, þar sem stuðningurinn mældist 47,7%.
Könnun MMR var framkvæmd dagana 26. ágúst til 2. september og var heildarfjöldi svarenda 929 einstaklingar, 18 ára og eldri.
