Segja má að hálfgert fát hafi komið á Jórunni Pálu Jónasdóttur, varaborgarfulltrúa Sjálfstæðisflokksins, þegar hún og Eyþór Arnalds, oddviti Sjálfstæðisflokks í borgarstjórn, svöruðu spurningum frá almenningi á Facebook-síðu Varðar, fulltrúaráðs Sjálfstæðisfélaganna í Reykjavík, í hádeginu í dag.
Það var Óskar Steinn Jónínuson Ómarsson, varaforseti Ungra jafnaðarmanna og fyrrverandi ritari Samfylkingarinnar sem varpaði umræddri spurningu fram. Svo virðist vera sem Jórunn hafi ekki alveg verið búin undir því að fá svona erfiða spurningu. Spurning Óskars var svona:
„Til Eyþórs. Hefurðu hugsað þér að skila 255 milljónunum sem þú fékkst frá Samherja, eða a.m.k skýra frekar út fyrir kjósendum í hvaða tilgangi fyrirtækið veitti þér þessa fyrirgreiðslu?“
Eins og sést á meðfylgjandi myndbandi byrjaði Jórunn að lesa spurninguna en þegar hún áttaði sig á innihaldi hennar hætti hún snarlega við. Eyþór greip þá inn í og svaraði spurningunni en þó ekki efnislega. „Það er verið að innleiða nýjar reglur fyrir borgarfulltrúa og embættismenn um fjárhagslega hagsmuni. Við höfum forystu um að embættismenn sem eru að taka ákvarðanir geri grein fyrir sínum hagsmunum. Það hefur ekki verið áður,“ sagði Eyþór meðal annars.
Stundin greindi frá því í október í fyrra að fjárfestingarfélag Samherji hefði afskrifað stóran hluta 225 milljóna króna láns sem Eyþór fékk fyrir hlutabréfum í Morgunblaðinu.
Myndbandið má sjá hér að neðan, en heyra má Jórunni bera upp spurninguna þegar 6:50 eru liðnar.
