Simmi Vill telur álag á kvöld- og helgarvinnu of hátt á Íslandi

Sig­mar Vil­hjálms­son stjórnar­maður At­vinnu­fjelagsins og Flosi Ei­ríks­son fram­kvæmda­stjóri Starfs­greina­sam­bandsins tókust á í Sprengi­sandi í morgun.

Aðal­um­ræðu­efni þáttarins var upp­á­stunga Simma um að sér­stakt álag á kvöld­vinnu ætti ekki að vera hér­lendis en í dag er 33 prósent álag á kvöld­vinnu og 45 prósent á helgar­vinnu.

„Hvatinn að þessu er að þegar við horfum í kringum okkur, þá er jafnari munur á milli þeirra sem vinna dag­vinnu á móti kvöld- og helgar­vinnu. Við erum í sérflokki þegar kemur að þessu,“ sagði Sig­mar.

„Ef við horfum til Sví­þjóðar, þá byrjar álag á dag­taxta að tikk­a eftir átta á kvöldin, eftir það leggst á álag sem er 18 prósent. Þessi 18 prósent gilda líka um helgar,“ segir Simmi.

Sig­mar segir lítil- og meðal­stór fyrir­tæki hafa hag af því að kaup­máttur launa sé mikill., því sé hann ekki að leggja til að lækka laun í landinu. „Það væri versta hug­myndin að lækka grunn­laun,“ sagði Simmi.

Þátta­stjórnandi Sprengi­sands velti því þá fyrir sér hvort það væri hvati til þess að fólk vinni kvöld og helgar­vinnu ef á­lagið lækkar.

Simmi svaraði því svo­leiðis að það væri erfitt að fá fólk til vinnu. Ef það er sam­keppni, þá ferð þú í yfir­boð. Lítil og meðal­stór fyrir­tæki eru ekki að greiða lág­marks­laun, sem allur fókus fer í að ræða um. Það eru sveitar­fé­lögin sem greiða lág­marks­laun,“ segir Simmi.

„Öll um­ræðan snýst um hóp og at­vinnu­taxta sem er ekki í at­vinnu­lífinu,“ segir Simmi um lág­marks­laun.