Lára G. Sigurðardóttir læknir segir að sími hennar hafi fyllst af gylliboðum um tónaðri líkama eftir að hún heyrði heilsufrömuð spyrja fylgjendur sína á samfélagsmiðli hvort þeir væru tilbúnir í sumarfötin.
Lára er bakþankahöfundur Fréttablaðsins og skrifar oftar en ekki um heilsutengd málefni sem eiga erindi við okkur flest.
„Síðan komu ráðleggingar um að drekka meira vatn og borða kolvetnasnauðara fæði. Upp frá þessu fylltist síminn minn af gylliboðum um tónaðri líkama. Mittismjórri. Álitlegri. Algrím Google telur nú að mig dreymi um betra boddí,“ segir Lára í bakþönkum blaðsins í dag.
Hún segir að megrun sé merkilegt fyrirbæri sem sögð er eiga rætur að rekja til Forn-Grikkja og er enn feykivinsæl eins og dæmin sanna.
„Reiknað hefur verið út að um tveir af þremur yfir kjörþyngd séu að jafnaði í megrun og fjórðungur fólks í eða undir kjörþyngd. Þá hafa megrunarkúrar verið talsvert rannsakaðir,“ segir Lára og vísar til dæmis í Christopher Gardner, prófessor við Stanford-háskóla.
Hún segir að hann hafi talið sig geta spáð fyrir út frá erfðaþáttum og insúlíngildum hvort fituskert eða lágkolvetnafæði henti betur.
„Þvert á spárnar hans sýndi rannsóknin að það sem skiptir mestu máli eru matarvenjur. Fólkið sem missti flest kíló átti það sameiginlegt að breyta sambandi sínu við mat. Það verslaði ferskan mat, hafði reglu á matartíma, eldaði fyrir sig sjálft, setti mikið grænmeti á diskinn og hafði athyglina á matnum þegar það snæddi,“ segir Lára sem spyr svo nokkurra lykilspurninga að lokum.
„En af hverju erum við svona oft í megrun? Er markmið lífsins að líta sem best út í bikiní? Mun það raunverulega breyta einhverju fyrir líðan okkar að losna við nokkur kíló? Nú get ég ekki fullyrt fyrir þig en rannsóknir sýna að það sem gerir fólk álitlegast er góða skapið. Almennt séð þykir hamingjusamt fólk mest aðlaðandi.“
Lára segir að „bergmálið um betra bikiníboddí“ haldi líklega áfram að elta hana, en þess í stað ætli hún að taka sitt boddí í sátt og ekki einblína á kíló. „Líður okkur ekki einmitt best þegar við borðum hollt, hreyfum okkur, sofum vel og höfum gaman?“
