Sigur­þóra: Þriðja bylgjan að hafa hrika­leg á­hrif á unga fólkið – „Þetta er að buga þau“

„Þriðja bylgjan er að hafa hrika­leg á­hrif á unga fólkið okkar. Við finnum fyrir stór­aukinni að­sókn í Bergið og ung­mennum líður mun verr en áður,“ segir Sigur­þóra Bergs­dóttir, fram­kvæmda­stjóri Bergsins headspace.

Sigur­þóra skrifaði færslu á Face­book í morgun sem vakið hefur mikla at­hygli, en þar vekur hún at­hygli á slæmri stöðu margra ung­menna í kórónu­veirufar­aldrinum. Bergið er stuðnings- og ráð­gjafa­setur fyrir ungt fólk upp að 25 ára aldri, en að sam­tökunum stendur fjöl­breyttur hópur ein­stak­linga sem hafa viða­mikla reynslu af mál­efnum ungs fólks.

Sigur­þóra segir að borið hafi á miklum kvíða, þyngslum og van­getu til að takast á við dag­leg störf í þessari ein­angrun sem nú er.

„Slæmar venjur eru að gera vart við sig s.s. að klæða sig ekki, komast ekki út í hreyfingu, slæmt matar­æði og fleira. Við óttumst að brott­fall úr fram­halds­skóla verði stór­fellt nú fyrir jól, þau eru ein­fald­lega að gefast upp fyrir verk­efninu,“ segir hún og bætir við að skipta megi vanda­málinu í tvo hluta.

„Annars vegar er fé­lags­leg ein­angrun að valda miklum vanda. Að fá ekki að hitta fé­lagana, að hafa ekkert fé­lags­legt til að hlakka til. Það er verið að taka svo mikið frá þessum ung­mennum núna. Það er auð­velt að setja sig í spor þess sem er að hefja fram­halds­skóla­nám, ég man hversu maður hlakkaði til. Þú kannski þekkir fáa í þínum skóla og nú eru engin böll, ekkert fé­lags­starf, engin fé­lags­leg tengsl og bara að læra heima í gegnum tölvu með öðrum sem þú þekkir ekkert. Mér finnst að fram­halds­skólar verði að bregðast við með ein­hverjum hætti. Opna skólana, bjóða upp á litla 3-5 manna náms­hópa, bjóða upp á stuðning á staðnum, leyfa krökkum að hitta náms­ráð­gjafann í per­sónu ekki bara í gegnum síma,“ segir hún.

Hún segir að hitt at­riðið snúi að því að fram­halds- og há­skóla hafa á­kveðið að minnka ekkert náms­kröfur þetta haustið.

„Þetta er að buga þau. Þau þurfa að læra svo mikið allan daginn, það virkar meira þar sem þau eru að gera þetta mest í sjálfs­námi, þó ein­hverjar kennslu­stundir séu í gegnum netið. Hægt er að koma til móts við þetta í fjöl­brauta­skólum með því að þau taki færri á­fanga, þar geta for­eldrar og skólinn stappað í ung­menni stálinu að það sé í lagi að vera að­eins lengur í fram­halds­skóla. Í bekkjar­kerfum er þetta erfiðara en ég óttast að þar verði mikið brott­fall nema fram­halds­skólar komi til móts við þetta,“ segir Sigur­þóra.

Hún segir að Bergið hafi að undan­förnu séð trausta náms­menn sem aldrei hafa verið í vand­ræðum í skóla upp­lifa mikinn vanda til að ná utan um náms­efnið eins og ætlast er til.

„Þriggja ára fram­halds­skólinn er ekki að vinna með okkur þarna, kannski þurfum við að skoða hvort þessi hópur fái ekki bara lengri tíma í verk­efnið. Eitt­hvað þarf að gera í haust og vor til að koma til móts við þennan hóp, því ef við missum þau út úr skólunum verður vandinn mun erfiðari við að eiga.“