Sigur­steinn: „Lítið að óttast“ – Egill: „Fjögur virk smit inn í landið á fáum dögum“

Sigur­steinn Más­son fjöl­miðla­maður segir það góða niður­stöðu að að­eins 0,2 prósent þeirra sem far­þega sem gengist hafa undir skimun á Kefla­víkur­flug­velli hafi reynst smitaðir af CO­VID-19. Hann segir að þessir ein­staklingar séu lík­lega ein­kenna­lausir við greiningu og séu þegar komnir í ein­angrun.

Á blaða­manna­fundi sem haldinn var í dag kom fram að tveir hefðu greinst með smit á Kefla­víkur­flug­velli í gær. Virk smit á landinu eru nú sex talsins.

„Við þessu mátti alltaf búast en hér er farið af stað með meira eftir­lit, utan­um­hald og eftir­fylgni en önnur ríki bjóða upp á og því lítið að óttast. Mjög mikil­vægt skref og það ein­mitt núna á meðan fáir eru á ferðinni því veiran gæti verið á sveimi næstu árin og alls ekki kostur fyrir okkar eyju að loka og læsa og henda lyklinum. Við þurfum að læra að lifa með henni þannig að það valdi ekki meiri ein­angrun og efna­hags­legum ham­förum sem munu þá fljótt koma niður á heilsu og vel­ferð lands­manna,“ segir Sigur­steinn.

Kona ein bendir Sigur­steini á að hún sé stressuð enda leigir hún út her­bergi í gegnum Airbnb og er með tvo undir­liggjandi sjúk­dóma. „Hef líka verið með Airbnb og lítið í því að faðma gestina mína og nú heilsa ég þeim ekki með handa­bandi og hef því litlar á­hyggjur. Með því að fara var­lega er þetta allt í lagi,“ segir Sigur­steinn.

Egill Helga­son, sjón­varps­maður og sam­fé­lagss­rýnir, hefur verið gagn­rýninn á opnun landsins og viðrað á­hyggjur sínar. Hann tjáir sig undir færslu Sigur­steins og segir: „Við erum á fáum dögum komin með fjögur ný virk smit í landið að því mér telst. Lög­reglu­þjónn fyrir austan smitaðist.“

Fleiri hafa lagt orð í belg um niður­stöðurnar sem kynntar voru í dag. Vil­hjálmur Birgis­son, for­maður Verka­lýðs­fé­lags Akra­ness og fyrr­verandi vara­for­seti ASÍ, segist viður­kenna fús­lega að hann hafi vissan kvíð­boga fyrir því að verið sé að opna landið að nýju fyrir ferða­menn.

„Það hefur komið fram í máli sótt­varna­læknis að ein­kenna­lausir ein­staklingar sem eru með kórónu­smit geta gefið falska niður­stöðu við skimun og því á­hætta að slíkir ein­staklingar komist inn í landið þrátt fyrir að skimun í Leifs­stöð hafi verið nei­kvætt,“ segir Vil­hjálmur og bætir við:

„Okkur tókst að út­rýma þessari ó­væru úr ís­lensku sam­fé­lagi með sam­stilltu á­taki þjóðarinnar og hví í ó­sköpunum erum við að stefna þeim á­vinningi í tví­sýnu í ljósi þess að um­tals­verð kórónu­smit eru enn til staðar vítt og breitt um heims­byggðina?“