„Aum er staða Katrínar Jakobsdóttur forsætisráðherra,“ segir ritstjórinn Sigurjón M. Egilsson í leiðara á vef Miðjunnar í dag. Sigurjón gerir þar stöðu Katrínar Jakobsdóttur forsætisráðherra að umtalsefni en Sigurjón segir að hún sé í mjög þröngri stöðu nú þegar tíu mánuðir eru til kosninga.
„Það er ekki nóg með að flokkurinn hennar nálgast dauðalínuna, hægt og örugglega. Hitt er verra að hún nýtur ekki stuðnings innan eigin ríkisstjórnar til að gera, eða leggja til, breytingar á stjórnarskránni,“ segir Sigurjón.
Hann bendir á að hagsmunir margra séu þeir að ekki verði hróflað við þeim hlutum stjórnarskrárinnar sem þrengir að afkomu þeirra.
„Þar fer fremst útgerðin. Þar er barist. Vopn útgerðarinnar eru tvö; Mogginn og Sjálfstæðisflokkurinn. Svo einkennilegt sem það er óttast Sjálfstæðisflokkurinn Moggann, og útgerðina.“
Sigurjón segir að samstarfsflokkarnir í ríkisstjórn, Sjálfstæðisflokkur og Framsóknarflokkur, hafi skellt á hana hurðum.
„Staða Katrínar er henni stórhættuleg. Svo aum að hún þarf að leggja fram þingmannafrumvarp um stjórnarskrárbreytingar. Samstarfsflokkarnir báðir hafa skellt á hana hurðum. Til að forðast fullkomna sneypuför verður Katrín, forsætisráðherra lýðveldisins, að treysta á stjórnarandstöðuna. Til að bjarga eigin pólitísku lífi.“
Sigurjón segir að þar sé ekki á vísan á róa og hætt sé við því að Píratar fallist seint á málamiðlunartillögur Katrínar.
„Leiðangur Katrínar verður háskaför og óvíst hvernig fer. Árum saman hefur Sjálfstæðisflokkurinn barst gegn breytingum og sagt að ekki mega breyta stjórnarskránni nema með breiðri sátt,“ segir Sigurjón sem endar pistilinn á þessum orðum:
„Nú er vafinn sá, hvernig fer fyrir Katrínu? Missir hún fótanna vegna andstöðu innan eigin ríkisstjórnar? Já, það er bara líklegt.“
