Sigurjón M. Egilsson, fjölmiðlamaður og ritstjóri Miðjunnar, segir býsna skemmtilega sögu af því þegar hann hitti heimsfrægan leikara á sundi í Miðjarðarhafinu.
Leikarinn sem um ræðir er enginn annar en Sean Connery, en hann lést eins og kunnugt er í dag, níræður að aldri. Connery er án nokkurs vafa einn þekktasti leikari 20. aldarinnar, en hann túlkaði James Bond á eftirminnilegan hátt í sjö myndum um njósnara hennar hátignar. Þá hlaut hann Óskarsverðlaunin árið 1988 fyrir besta leik í aukahlutverki.
Sigurjón skrifaði skemmtilega færslu á Facebook-síðu sína í dag um augnablikið þegar hann hitti Connery, en þá hafði hann skellt sér í sjóinn ásamt syni sínum þegar þeir rákust á leikarann fræga fyrir algjöra tilviljun.
Mætti Sean Connery á sundi í Miðjarðarhafinu
„Í fyrstu Mallorcaferðinni mættum við Janus Sean Connery á sundi í Miðjarðarhafinu.
Ströndin sem við vorum við var innst í litlum firði. Aðeins utar við fjörðinn voru glæsihús glysfólksins. Utan við húsin voru seglbrettin geymd. Lágu við festar.
Ég hafði keypt fínustu vindsæng og við feðgar fórum oft út í fjarðarmynnið. Janus var á dýnunni en ég fyrir utan og synti með henni. Á landstími sáum við tvo menn koma syndandi út frá stóru og fínu húsunum. Mér fannst sem þeir væru í vanda svo ég setti stefnuna að þeim. Í þann mund sem ég kom að þeim náðu þeir að einu brimbrettinu.
Og viti menn. Annar þeirra var njósnari hennar hátignar. Eða réttara sagt Sean Connery. Hann var hinn kurteisasti. Kastaði kveðju á okkur feðga og gat til kynna að allt væri eins og það átti að vera.
Við héldum áfram í land og þegar þangað var komið sögðum við hvern við hefðum hitt. Flestir sögðu okkur segja ósatt. Til hvers áttum við að gera það?
En blessuð sé minning „sundfélaga“ okkar.“
