„Ég var aldrei órólegur yfir Covid í vor. Ég vissi að við værum eins vel undirbúin og hægt var til að taka við þeim sjúklingum sem kæmu og að þjóðin sem heild myndi ná að brjóta þennan kúf og takmarka fjöldann sem við þyrftum að sinna,“ segir Sigurjón Örn Stefánsson svæfingalæknir.
Sigurjón skrifaði færslu á Facebook-síðu sína í fyrrakvöld, sama dag og tilkynnt var að 99 hefðu greinst með kórónuveiruna. Í gær bættust 87 í hópinn og í dag 94 einstaklingar. Segja má að staðan sé orðin býsna skuggaleg með tilliti til fjölda smita.
Eins og að framan greinir segist Sigurjón ekki hafa verið órólegur í vor þegar fyrsta bylgjan gekk yfir. En staðan í dag er önnur. Sigurjón veitti Hringbraut leyfi til að birta færsluna.
„Nú í dag er ég hálf órólegur. Ekki vegna þess að við séum verr undirbúin því það erum við ekki. Ég er órólegur því mér finnst komin þreyta í fólk yfir þessu, mér finnst margir ekki lengur vera að taka mark á því sem þarf að gera og það er fáránlegt. Það er fáránlegt því núna í dag lifum við EKKI fordæmalausa tíma. Við vitum alveg hvað þarf að gera til að minnka skaðann, það eru fordæmi fyrir því,“ segir hann.
Sigurjón birti sambærilega mynd og hér að ofan í vor til að minna fólk á að það væri ekkert grín að fá veiruna. Hvatti hann jafnframt fólk til að fylgja fyrirmælum. „Nú, nokkrum mánuðum og nokkrum dauðsföllum seinna birti ég nýja mynd en skilaboðin eru þau sömu,“ segir hann.
Eins og að framan greinir birti hann færsluna sama dag og 99 smit greindust og síðan þá hefur staðan ekki batnað mikið. „Einföld tölfræði segir mér að einn eða tveir af þessum hundrað muni ég þurfa að sinna á gjörgæslu. Ekki láta mig þurfa að sinna þér á gjörgæslu!,“ segir hann að lokum.
